УДЖАЛЫСЬ НЫВБАБАЛЫ БУРСИӦМ
Тыри дас вит во, кыдзи водзмӧстчысь нывбабаяс став му вылас быд во празднуйтӧны ассьыныс ыджыд луннысӧ.
Миян Сӧветса государствоын уджалысь нывбабаяс таво празднуйтӧны тайӧ лунсӧ вӧляысь (повтӧг) кӧкъямысӧдысь. Кӧкъямысӧд во нин миян пукалӧ Сӧвет власьт, коді мездіс нывбабаясӧс сьӧкыд олӧмысь, ӧткодяліс праваӧн мужикъяскӧд, чуксалӧ ӧтвылысь кыпӧдны Сӧветса государство уджавны — веськӧдлыны быд Сӧветса уджӧн.
Мукӧд государствоясын, кӧні власьтыс озыръяс кипод улын, уджалысь нывбабаяс вермасьӧны мездысьны озыръясысь, зільӧны воны рочмувывса нывбабаяс выйӧдз жӧ. Уна миллион нывбаба озыръяс кабыр улын, быдлаын (Россияысь кындзи) ымзӧны-терпитӧны быдсяма лёк олӧмсӧ. Найӧ видзӧдӧны миян Сӧветса Республика вылӧ югыд шонді вылӧ моз. Найӧ надейтчӧны: коркӧ пӧ миянлы тшӧтш кутас усьны югӧрыс Сӧветса шонділӧн, коркӧ пӧ ми на мездмам сир курыд олӧмсьыным озыръяс улысь.
Тайӧ праздник лунас ставмувывса уджалысь нывбабаяс ещӧ на петкӧдласны озыр государствояслы ассьыныс выннысӧ, мездӧдчӧм понда кыпӧдчӧмнысӧ. Миян мездысьӧм Сӧвет мувывса нывбабаяс тайӧ лунӧ думнаныс ӧтувтчасны мукӧд государствоса чойясныскӧд, ӧтсьӧлӧмӧн ыстасны налы ыджыд чолӧмбыттьӧ, сетасны налы сьӧлӧм да вынйӧр, медым регыдджык мездысьны пӧдӧм олӧмысь да кутчысьны выль долыд олӧм дорны.
Уджалысь нывбабаяс ӧтвылысь мужикъяскӧд вермасны вӧчны быдтор. Видзӧдлам кӧ ми ӧкмыс во сайӧ бӧрӧ, аддзам: Питерса уджалысь нывбабаяс тайӧ лунӧ 1917ʼ воын пуктісны медводдза из февральса революциялы. Найӧ посньыдик челядьныскӧд, тшыгӧсь, петісны ывла вылӧ да ӧтвылысь кыпӧдісны гӧлӧснысӧ: «Вайӧй нянь, вӧчӧй мир, сетӧй вӧля, помалӧй война — бергӧдӧй гортӧ мужикъяснымӧс!» Найӧ гӧлӧс шыӧ тшӧтш ӧтлаасисны рабочӧйяс, салдатъяс эз вӧрзьӧдны ӧружйӧтӧм тшыг мамъяснысӧ, чойяснысӧ, посни челядьнысӧ. Кыпӧдчӧм ыдждіс, паськаліс да куим лун мысти лои революция — сарлысь власьтсӧ чӧвтісны.
Ӧні Сӧвет власьт дырйи рочмувывса уджалысь нывбабаяслы, торъя нин миян коми крестьянкалы, колӧ ёнджыка велӧдчыны, зільджыка водзмӧстчыны сӧветса удж дорӧ, бурджыка пӧльзуйтчыны став праванас, чорыдджыка топӧдчыны Сӧвет власьт да коммунист партия бердӧ.
Тайӧ лунӧ быдӧн — Сӧвет власьт и, коммунист партия и, быдсяма организация и, став уджалысь йӧзыс и, — быдӧн ӧтвылысь отсаласны уджалысь нывбабаяслы лоны выль бур олӧм дорысьясӧн.
Коми аньяс! Энӧ вунӧдӧй ассьыныд ыджыд луннытӧ!
