КООПЕРАТИВ СОДТІС АССЬЫС ШЛЕНЪЯССӦ ДАЙ ЛӦСЬӦДІС МЕЛЬНИЧА

Поёлын (Сыктыв уездын) крестьяна 1917 воын заводитісны «Пытшкӧс» шор вылӧ вӧчны мельнича. Быд мортлы лои уджавны сэні 300 лун гӧгӧр. Мельничаыс эштіс дай босьтчыліс изны 1921 воын вӧлисти. Сӧмын бура изӧм эз и лолы. Ӧти-кӧ, кос поводдя дырйи ваыс абу, мӧд-кӧ, плӧтинасӧ ытва дырйи вӧлі помала нуӧ: крестьяна некыдзи эз вермывны бура вӧчны плӧтинасӧ. Зэв оз во вӧлі налы сьӧлӧм выланыс асланыс мельничаыс, лоӧ вӧлі мукӧд вӧлӧсьтса мельничаӧ изӧдчыны мунны. Колян во май тӧлысьын крестьяна асланыс собранньӧ вылын шуисны сетны мельничасӧ кооперативныслы. Сы пыдди кооператив босьтіс шленъясӧн крестьянаӧс, кодъяс уджавлісны мельнича лэптӧм вылас, пай босьттӧг, уджалӧмсӧ пай пыдди лыддис. Сы вӧсна май тӧлыссянь тавося январ тӧлысьӧдз вель уна соді кооперативӧ выль шленыс. Кооператив мельничаын изӧм зэв ёна бурмӧдіс. Ыджыд ва дырйи вермӧ изны 200 пудйӧдз суткиӧн. Со кутшӧм буртор петкӧдліс крестьяналы кооперация — ӧти-кӧ, крестьяналы мельнича сетіс; мӧд-кӧ, крестьянаӧс шленӧ ас пиас пыртіс, ёнмӧдіс асьсӧ. Крестьяна ещӧ нин ёна казялісны кооперативлысь коланлунсӧ.

Д. Куликов.