МЫЙ ВӦСНА КОЛӦ БУРМӦДНЫ ВИДЗ УДЖАЛӦМ
Миян крестьяна му вӧдитӧны куим переменаӧн. Сю кӧдзлӧм бӧрын ид кӧдза улӧ колӧ нин мутӧ куйӧдавны. Он кӧ куйӧдав, омӧля и нянь ваяс. Кымын уна куйӧд, сымын мулы бур. Куйӧдыд крестьяналӧн скӧт видзӧм сайын. Уна скӧтысь уна куйӧд артмӧ. Скӧтлы колӧ тырмымӧн турун.
Ӧні йӧзыд быдӧн норасьӧны: «Важӧн пӧ тайӧ жӧ видзьяс, да унджык вӧлі воӧ турун, ӧні пӧ дзикӧдз нин изӧрмисны». Тайӧ сідзи и эм. Видзьяс воысь воӧ изӧрмӧны, воысь воӧ омӧльджыка турунзьӧны: кодыс вутшкӧссьӧ, кодыс ягвывмӧ, кодыс нюрмӧ. Сэсся ӧд нюръясад, вывті васӧд да няйт инад быдман эжӧрыд да ситуруныд абу пӧтӧсӧсь, чӧскыдтӧм. Дерт, сэтшӧм туруныд абу бур крестьяналы. Мӧс кок увтыр картаын турун, а йӧв абу. Татшӧм турунсьыд йӧв оз и ло, медтыкӧнӧсь мӧсъясыд тулыс кежлӧ ловйӧн кольӧны-а.
Оз зэв и муяс крестьяналӧн бурмыны. Миян тані, кӧдзыдінад, муясыдлы куйӧдыд мортлы юны моз жӧ колӧ. Этша куйӧдӧн му воысь воӧ гармӧ, выныс чинӧ. Сэсся миян пыр ӧтарӧ ӧти пӧлӧс сю, ид, зӧр и кӧдзӧны. Налы куимнаныслы быдмыны колӧ ӧти пӧлӧс сёян муысь. Весиг найӧ висьмывлӧны ӧткодь висьӧмъясӧн.
Мусинмын эм уна пӧлӧс сёян турунъяслы. Сёянсӧ крестьяна шуӧны вынӧн. Сю, ид, зӧр кыскӧны муысь ӧти пӧлӧс сёян, бобӧнянь да мукӧд пӧлӧс турунъяс сэтшӧмсӧ этшаджык нин кыскӧны, налы колӧ мӧд пӧлӧс. Картупельлы, сёркнилы, анькытшлы бара аслыспӧлӧсджык. Пыр ӧтитор кӧдзӧмӧн муысь бырӧ ӧти пӧлӧс сёян, мукӧд пӧлӧсыс весьшӧрӧ олӧ. Мед эськӧ весьшӧрӧ муын сійӧ оз ов, колӧ кӧдзлывлыны мыйкӧ мӧдтор. Куим перемена пыдди унджык пӧлӧс кӧдзаӧн вӧдитны.
Та ногӧн оз на куйӧдтӧгыд ёна бурмы. Мед содӧ куйӧд, колӧ бурмӧдны видз. Этша видз-муысь крестьяналы позьӧ паськӧдчыны видз вылӧ: кӧдзны турун, сёркни, мукӧд сэтшӧмтор. Ӧткымын видзьяс миян куйӧдавтӧг куйӧдасьӧны. Тайӧ овлӧ со кыдзи: эмӧсь муяс мыльк йылын, нӧрыс вылын. Нӧрыс улас видзьяс. Куйӧдтӧ ми петкӧдам тӧлын, лымйӧн. Тулыснас, лым сылігӧн куйӧд вынтӧ лым ваӧн, гожӧмын зэрӧн кылӧдас улӧ, видз вылӧ. Сэтчӧ турун пӧвстас сэсся и пуксьӧ. Татшӧм видз вылад бурджыка му вылад дорысь скӧтӧс вердан кӧдзаясыд быдмас. Со мый вӧсна и колӧ сэтчӧ кӧдзны скӧтӧс верданторъяс, бӧр вӧчны куйӧд да му вылӧ катӧдны.
Коми муад миян нянь уджалӧмыд ставыс скӧт видзӧм сайын, куйӧд сайын. Скӧт видзны колӧ унджык дай бур турун. Та вӧсна колӧ тӧждысьны видзьяс бурмӧдны. Бур видзьясӧн миян бура паськалас скӧт видзӧм да нянь воӧм.
Агроном Тювин.
