ЛӦСЬӦДЧӦЙ СТАВМУВЫВСА НЫВБАБА ПРАЗДНИК КЕЖЛӦ

«Правда» газетын тӧрытъя номерын Н. К. Крупская ёрт гижӧма статья: «Колӧ лӧсьӧдчыны ставмувывса нывбаба праздник лун кежлӧ». Сэні сійӧ со мый гижӧ:

«Ставмувывса нывбаба праздник лун кежлӧ лӧсьӧдчигӧн колӧ бура мӧвпыштны, кутшӧмджык ногӧн да мыйӧн позьӧ отсавны крестьянкалы.

Колӧ отсавны крестьянкалы аслас быдлунъя олӧмыслы, уджыслы. Колӧ велӧдны, кыдзи сылы ассьыс дзоньвидзалунсӧ видзны, кыдзи челядьӧс дӧзьӧритны, код ногӧн бурджыка видзны да лӧсьӧдны сёян-юан, кутшӧм ногӧн вӧчны мукӧд пӧлӧс удж. Тайӧ медпосни отсӧгыс ёна кокньӧдас крестьянкаӧс.

Колӧ крестьянкалы отсавны лӧсьӧдны яслияс, челядьныслы садъяс, школаяс, сэсся отсавны крестьянкалы аслыс велӧдчыны грамотаӧ, книгаяс, газетъяс лыддьыны. Ыджыд мог отсавны сылы уджсӧ нуӧдны сӧветъясын, мӧда-мӧдлы отсасян комитетын, школаса сӧветъясын, кооперативъясын.

Крестьянкаӧс колӧ мырддьыны ӧткӧн олӧмысь, колӧ вӧчны сідзи, медым сійӧ казяліс, медым сылы тӧдчис — сійӧ юкӧд (часть) чукӧра олысьяс йӧз пиын, сійӧ юкӧд ыджыд дзоньторлӧн.

Сэсся колӧ висьтавлыны крестьянкаяслы: кыдзи лои, кыдзи быдмис рабочӧй класс, мый сылы став тайӧ быдмӧмыс сувтіс, код ногӧн мырсьӧны, вермасьӧны рабочӧйяс бур олӧм му вылын лӧсьӧдӧм понда.

Тайӧ лунӧ муналасны деревняясӧ унаӧн сэні праздник колльӧдны. Быд ёртлы деревняӧ мунігӧн тайӧ лун кежлӧ колӧ бура тӧдны рабочӧй класс вермасьӧм йылысь, став му пасьталаыс венласьӧм йылысь.

Сэсся колӧ висьтавны крестьянкаяслы, кутшӧм йӧзӧс ми кӧсъям быдтыны найӧ челядьысь, кыдзи кӧсъям корсьны да лӧсьӧдны шуда олӧм.

Пионеръяс отсаласны миянлы. На вылӧ видзӧдӧмӧн казьтыштас крестьянка ассьыс челядьдырся важ олӧмсӧ, аддзас, кутшӧм гажа олӧмлань ми ставным мунам.

Колӧ лӧсьӧдчыны ставмувывса нывбабаяс праздник лун кежлӧ».