ЗАКАВКАЗСКӦЙ РЕСПУБЛИКАЛӦН ЧОЛӦМБЫТТЬӦЯС СССР-са ЦИК СЕССИЯЛЫ

ТИФЛИС. Горсӧветлӧн вӧлі гажа пукалӧм. Сэні вӧліны представительяс рабочӧйяссянь да партийнӧй, военнӧй да общественнӧй организацияяссянь — ставыс 1500 морт. Президиумын вӧліны Калинин, Рыков, Рудзутак да мукӧд СССР-са ЦИК сессия вылӧ воӧм ёртъяс. Президиумас жӧ вӧліны Закавказскӧй да Грузияса правительстволӧн шленъяс: Орахелашвили, Элиава, Цхакая дай мукӧд. Пукалӧмсӧ восьтіс Грузияса ЦИК-ын председательыс Цхакая. Сійӧ шуис: медводдза кывъясыс тані колӧ лоны Ленин ёртӧс казьтыштӧм кузя. Оркестр ворсӧ дзебигӧн-колльӧдігӧн ворсан марш. Сэсся Цхакая висьталӧ чолӧмбыттьӧ СССР-са ЦИК сессиялы став Закавказса Республикаяс рабочӧй да крестьяна нимсянь. Сэсся налы жӧ чолӧмбыттьӧ висьталісны Закавказскӧй коммунист организациясянь, Грузияса ЦИК-сянь, Азербайджан ЦИК-сянь председательыс Агамали-Оглы, Арменияса Совнаркомсянь председательыс Рукошин, Тифлисса Сӧветсянь Сухишвили. Чолӧмбыттьӧ висьтавлісны рабочӧйяс да служащӧй нимъяссянь, крестьяна нимсянь. Крестьяна нимсянь висьталысь Гамлашвили шуис: Грузияса крестьяна паськыда отсаласны Сӧвет власьтлы промышленносьт да видз-му уджалӧм лэптӧм кузя. Рабочӧйяс нимсянь висьталіс чолӧмбыттьӧ рабочӧй Дзамонашвили. Сійӧ шуис: рабочӧйяс — войдӧрджык кодъяс вӧліны меньшевикъясӧн — зільӧны быд ногӧн дзикӧдз бырӧдны меньшевик партия. Сэсся кыв сетсьӧ Калинин ёртлы. Калинин ёртӧс ставныс ёна чествуйтісны.^Калинин ёртлӧн висьталӧмыс лоӧ мӧд лунъя газетын./^

Петровскӧй да Червяков ёртъясӧн чолӧмбыттьӧ висьталӧм бӧрын сетсьӧ кыв Совнаркомса Председательлы Рыков ёртлы. Рыков ёртлы ставыс залын пукалысь йӧзыс вӧчисны зэв кузя чествуйтӧм.