ВИДЛЫ КӦЙДЫСТӦ ВОДЗВЫВ

Унаысь овлӧ, крестьянин кӧдзас мусӧ быттьӧ зэв бур кӧйдысӧн, а кӧдзаыс петавлас зэв шоча. Эськӧ мусӧ бура куйӧдалӧма и, поводдяыс мича вӧлі и. «Мый нӧ торкис?» — шензьӧ сэки крестьяниныд.

Кӧйдысыд мукӧддырйиыс воштывлӧ ассьыс чужалан-петаланлунсӧ (всхожесть). Колӧ кӧдзтӧдзыд видлыны кӧйдыстӧ — чужӧ оз, туяс оз кӧдзны сійӧн. Унаысь ӧд гӧль крестьянинлӧн оз овлы ас кӧйдысыс, лоӧ босьтны уджӧн либӧ корны комитет взаимопомощисьыд — быдсямаыс вермас веськавны. Видлытӧгыд кӧ сэсся кӧдзан, прӧста няньыд вошӧ дай уджалӧмыд весь лоас.

Сэсся торъя омӧль кӧйдыс веськавлӧ турун кӧйдыс да пуктас кӧйдыс пиысь. Миян пуктас кӧйдыстӧ нывбабаяс унджыкысь босьтавлӧны кока лавкаяслысь, дерт бара быдсямаыс веськавлӧ.

Сы понда водзвыв видлытӧг кӧдзны ни пуктыны оз ков.

Кӧйдыс видлыны зэв кокньыд. Босьтсьӧ небыдик гынтор либӧ прӧстӧй дӧра, шӧри кусыньтсьӧ, шӧракостас пуктыссьӧ кӧйдыс (100 тусь) — кӧйдысыс босьтсьӧ бӧрйытӧг мешӧк шӧрсьыс; уна пельын кӧ кӧйдысыд — быдлаысь тадзи 100 тусьӧн босьтсьӧ. Сэсся кӧтӧдӧны тасьтіын да пуктӧны шоныдінӧ, медым сӧмын дӧра вывтіыс ваыс эз вӧв.

Шоныдінын васӧд дӧра костын кӧйдыс кутас нырсявны. Нырсялӧм кӧйдыссӧ колӧ бӧрйыны да пасъявны, кымын лунӧн кымын кӧйдыс тусь нырсяліс. Нянь кӧйдыс нырсялӧ ставыс 10 лунӧн; таысь дырӧн кӧ чужас — сійӧ оз ков лыддьыны. Шуам, дас лунӧн кӧ чужис 100 тусь пиысь 90 тусь — шусьӧ 90% чужан кӧйдысыс. Шӧркоддьӧма миян кӧйдысысь лыддьысьӧ: сю 91%, шобді 93%, зӧр 85%, ид 90%.

10 лун срокыс тырмидз лыддьысьӧ уна пӧлӧс турун кӧйдыслы и пуктасъяслы, сӧмын морковлы да свеклӧлы колӧ вежон кыкӧдз. Пуктасъяслӧн шӧркоддьӧм чужаныс лыддьысьӧ: анькытшлӧн — 95%, капусталӧн — 90%, кушманлӧн — 90%, морковлӧн — 85%.

Турун кӧйдыслӧн: бобӧнянь (гӧрдъюр) — 83%, люцерна — 83%, тимофеевка — 85%.

Таысь кӧ этшаджык чужӧ кӧйдысыд, лыддьысьӧ омӧльӧн, колӧ нин сэки весавны либӧ дзикӧдз вежны.

Матысмӧ тулыс, колӧ водзвыв мӧвпыштны кӧйдыс йывсьыд.