ПОМӦСДІНЛЫ

...Сьӧлӧмӧс менсьым эн майшӧдлы,
Абутӧм шудлунсӧ нопйӧ эн тэч.
Чужанін, долыдлун пайдыштін,
Кынмывлӧм лов шыӧс малыштін,
Паметьлы лӧсьӧдін лэч.
Шеді тай... гуг ни бан олӧмын
Дзик ӧти кольӧма гаж —
Воштӧмысь полӧмӧн,
Здук кежлӧ волӧмӧн,
Перйывны выль пыдди важ.
Ичӧтдыр шондіа гожӧмсӧ,
Медводдза радейтчӧм кӧр,
Рытъявыв чӧвлунсӧ,
Ва бердлысь ньӧжлунсӧ,
Аръявыв мичмӧдчӧм вӧр...
Чужан му тшупӧма сьӧлӧмӧ
Медся бур здук,
Медся лӧнь кад,
Медмича асъядор кыа...
Ме сӧмын паметьысь перъяла
Казьтывлӧм..
Шӧртӧс моз чуньяс пыр лэдза
да олӧм сер кыа.
Казьтывла...