* * *

усьӧмаяслы, видзысьяслы да волысьяслы

Дзурк-дзурк, дзурки-дзурк —
Дзуртӧ гусьӧн парма чурк.
Дзуртӧ-виччысьӧ,
Важас видзӧдчӧ...

А миян чужлытӧм челядьлы
Некод нин «ӧввӧ» эз сьыв
Да бур кывйӧн уджӧ эз ышӧд.
Эз гӧтырпу — войнаыс
Бӧръяӧн топӧдліс сыв,
А миянысь кольӧма
Вижӧдӧм гижӧд
да некымын кыв:
«Усьӧма тышын.
Усьӧма тышын...»

А чужан му виччысьӧ,
Да дзик быд во корӧ:
«Бӧр, дитяӧй, лок,
Кӧть лымйӧн лок,
Донаӧй, гортӧ».
Но колим ми сэні,
Кӧн тувччаліс бӧръяысь кок.
И некод оз аддзы нин
Миянлысь
кодйытӧм гусӧ,
Кӧн пыдӧстӧм енэжыс
Окалӧ кӧдзалӧм мусӧ,
Да кыаыс садьмӧ,
А рытланьыс вочасӧн кусӧ...

Ми кылам, кыдз вояс пыр дзуртӧ
Да сёрнитӧ важ парма чурк.
Ми кылам! Но бӧрсӧ ог воӧй.
Но быд во май тӧлысьӧ
Ойдылӧ ю,
И лэдзалӧ коръяссӧ
Нэриник бадь пу...
А тадзи кӧ —
Чужан му вылын
Ми кодлыкӧ колам на.
Колам!..
И дзик быд во
Медбӧръя лымйӧн
Ми пармаӧ волам...