* * *

енъяс енэж пыдӧсас
чӧв олӧны,
кор мунӧмаяс
миян дорӧ
вӧтӧн волӧны
_____

сёрнит мекӧд,
ыджыд мамӧ, сёрнит,
мед кӧ тэ дорӧ
ме вояс вылӧ сёрми.

видзӧд менӧ,
ыджыд мамӧ,
волывлан кор, видзӧд.
медым меным комын куим —
ме ӧд пыр на ичӧт.

вынсьӧд менӧ,
ыджыд мамӧ,
сьӧлӧм руӧс вынсьӧд,
гӧгӧрбок кор
олан шудыс
вальдӧ-киссьӧ.

дзигӧд менӧ,
ыджыд мамӧ,
вӧтын дзигӧд,
медым меным
комын куим,
ме ӧд пыр на ичӧт.
сідз ӧд?