* * *

Джын. Джын.
Еджыдыс — едждӧ,
А сьӧдыс — сьӧдасьӧ.
Тшын. Тшын.
Тшынасьӧ-тышкасьӧ
Тӧлыскӧд бипурыс,
Вын. Вын.
Коялӧ бикиньсӧ,
Колялӧ му вылас
Вир туйсӧ.

Вой. Вой.
Вӧйтӧма Войпельыс
Войтӧла войясас
Важкадся дойяссӧ.
Джын. Джын.
Джынъяліс енкола
Вӧвлӧм да абутӧм
Вӧтъяссӧ.
Тшын. Тшын.
Бипурыс ӧнӧдз на
Чусалӧ-тшынасьӧ,
Виччысьӧ. Вынасӧ.

Рӧм-дӧ.
Рӧмдігас рӧмъяснас
Сынӧдыс ворсӧ,
Вӧр дорас вералӧ,
Вӧрӧ да воссьӧ
Кыаӧн.
Лӧза-гӧрд
Кыӧмсӧ
Вӧр весьтас косьтӧ.
Войыслысь водзӧссӧ босьтӧ.
Асывсӧ туналӧ-восьтӧ.

Гор. Гор.
Горӧдас гӧрдінас,
Пасьвартас паськалӧм
Чӧвлунсӧ.
Тшын. Джын.
Еджыдыс — едждас,
А сьӧдыс — сьӧдасяс.
Ним-кыв.
Висьтавсяс.
Орӧдчас.