* * *

катша-катша, китш-котш,
тшӧті-кадыс: тітш-тотш.
а катша бӧж йылас —
олӧмыс да кулӧмыс
да ас туй кузя мунӧмыс...
_______

рытъя ру пырыс
кылӧ сьылӧм,
рытъя кыаас
шыыс сылӧ:
«алӧй ленточка —
лежнӧг кустын,
чав виж ленточка —
мырпом нюрын,
нюдзвиж ленточка —
турун пиын,
мугов ленточка —
пувъя ягын».

енэж веркӧсас —
пыжтӧмаяс,
рытъя чӧвлунас
пышйӧмаӧсь:
«еджыд ленточка
менам вӧлі,
яла яг вылын
куйлӧ ӧні.
лӧзов ленточка —
чӧдлач рӧма,
мича тусь пиас
дзебсьыштӧма».

Эжва ю кузя
кывтӧ руыс —
пыжтӧмаяслӧн
лёкыс-бурыс:
«са сьӧд ленточка
дзеби вӧрӧ,
медым шоглунӧй
лов оз вӧрӧд.
муса милӧйӧс
дзеби муӧ,
коркӧ аддзысьлӧм,
гашкӧ, сюрӧ...»
_______

катша-катша, китш-котш.
кадыс лыддьӧ: тітш-тотш...