ВАЖГОРТЫН

(Емдін уездын)

Партийнӧй удж

ньӧти оз тӧдчы. Эм вӧлӧсьтас квайт коммунист да, олӧны найӧ мӧда-мӧдсьыс ылын: куимыс вӧлӧсьтас, мӧд куимыс боки деревняясын — верст 15 сайын кымын. Политика омӧля тӧдӧны. Велӧдчӧм ас костаныс, ячейкаас некутшӧм оз мун. Колӧ эськӧ Важгортӧ ыстывны уджсӧ сувтӧдны кужысьджык мортӧс.

РЛКСМ

абу вӧлӧсьтын. Том йӧз оз весиг тӧдны, мый РЛКСМ-ыс лоӧ. Олӧны важ ногӧн, енмысь ёна полӧны.

Йӧзӧс югдӧдан

удж вӧлӧсьтын мунӧ. Эм нардом. Праздникъясӧ спектакъяс овлӧны. Нардомыс эськӧ и бур да, кытсюрӧ дзоньталыштны колӧ. Сьӧмыс абу сы вылӧ. Спектакъяссӧ дон босьттӧг сувтӧдавлӧны.

Вӧлӧсьтын 4 школа. Велӧдысьыс 5. Кык школаыс общественнӧй керкаынӧсь, мӧд кыкыс крестьяна ордын. Общественнӧй керкаясас колӧны кытсюрӧ лӧсьӧдалӧм, дзоньталӧм. Сетӧмаӧсь эськӧ сы вылӧ сьӧмтор, да этша, оз тырмы. Арнас Емдінын вӧлі сетӧмаӧсь школа вевтъяс краситны олифа, да ӧнӧдз сійӧ эз во миянӧ: быттьӧкӧ пӧ Косланӧ сибдӧма.

Велӧдчан када челядь вӧлӧсьтын — 288 морт. Велӧдчӧны на пиысь — 82%.