ПОЛЬШАСА БАНДИТЪЯС ВЫЛЫН СУД
Каминскӧй вӧлӧма агентын жандармерияын
Минск. Койдановоӧ уськӧдчылысьяс польшаса бандитъясвывса судын мунӧ юасьӧм мыждана Торновскӧйлысь. Торновскӧй висьталӧ: Койдановоӧ пӧ ставыс уськӧдчылісны 12 морт. На пиын вӧліны кӧкъямыс полицейскӧй да ӧти поручик. Мукӧдыс вӧліны Рубежевич сиктын олысь йӧз. Уськӧдчытӧдз войдӧр поручик шуис, колӧ пӧ миянлы мунны да пырны особӧй отделӧ, мездыны сэтысь арестуйтӧм йӧзӧс, босьтавны став документъяссӧ отделсьыс, гӧрдармеечьясса постъяс кватитны. Свидетель Скребцов висьталӧ: ми пӧ Торновскӧйкӧд ӧти камераын пукалім (Скребцовӧс судӧдзыс мыждана йӧз мозыс жӧ пуксьӧдлісны стража улӧ). Торновскӧй шуліс меным, надзирательясыслысь пӧ вай мырддям оружйӧсӧ, караулын сулалысь йӧзсӧ виам да пышъям Польшаӧ. Менӧ пӧ Торновскӧй кӧсйысис инавны служба вылӧ польшаса жандармерияӧ. Торновскӧй кӧсйӧ вӧлі бара чукӧртны йӧзӧс (бандаӧс) да уськӧдчывны Минск вылӧ.
Суд водзӧ ӧтпырйӧ вайисны Торновскӧйӧс да Скребцовӧс (
Сэсся суд юасьны кутіс Ксеневичӧс. Ксеневич вӧвлӧма капитанӧн сардырся армияын, вӧвлӧма белоруссияса белогвардейскӧй отрядъясса штабын начальникын. Сійӧ отрядъясыс овлісны Польшаын, уськӧдчывлісны Сӧветскӧй Белоруссия вылӧ. Ксеневич висьталіс: Рижскӧй договор (Сӧвет власьт Польшакӧд договорсӧ лӧсьӧдлісны) бӧрти пӧ Польша отсасис миян отрядлы, сетавліс оружйӧяс, военнӧй кӧлуй. Сетавліс пӧ миянлы сьӧм Савинков.*
Ксеневичлы петкӧдлісны карточка Койдановоӧ уськӧдчылігӧн виӧм мортлысь — Каминскӧйлысь. Ксеневич шуӧ: тайӧ мортсӧ пӧ ме тӧда. Тайӧ пӧ вӧвлі агентын польшаса жандармерияын.
Та вылын судлӧн следствиеыс помасис.
* Савинков — социал-революционер партияын сулавліс (эсер), ёна быд ногӧн мунліс паныд Сӧвет власьт вылӧ. Ӧні сюри миян киӧ, судитісны да, пукалӧ стража улын.
