ЗЕЛЕНЕЧСА ОБЩЕСТВЕННӦЙ ЛАВКА

Зеленечса общественнӧй лавка воссис 1924ʼ воӧ, юнь тӧлысьын. Восьтысьыс вӧлі Ӧ. Р. Ладанов. Восьтігас пырисны шленӧ сӧмын 53 морт. Мукӧдыс дыр петитчисны, полӧны сьӧм вошӧмысь, важ ЕПО-сӧ тупкигӧн шленъясыслы сьӧмсӧ абу вӧлі сеталӧмаӧсь да.

Лавка правленньӧын куим морт: председатель, счетовод да приказчик. Тӧргуйтны заводитігӧн правленньӧлӧн ньӧти сьӧмыс эз вӧв. Пасибӧ — Обсоюз да государственнӧй организацияяс отсалісны. Тӧварсӧ ставсӧ уджӧн лӧсьӧдім. Юньсянь октябрӧдз лои босьтӧма тӧварсӧ 10.828 шайт дон. Вузалӧма — 7020 шайт дон. Барыш воӧма 780 шайт. Сійӧс юклӧмаӧсь со кыдзи: унджыксӧ сюйӧмаӧсь лавка капиталас, сэсся — мыйсюрӧ ньӧбавны, мыйкӧ мында шуӧмаӧсь сетны шленъяслы, велӧдчан уджъяс нуӧдны да вотчина уджалан машинаяс вылӧ.

1924 вося октябрсянь 1925 во февральӧдз ньӧбӧма тӧвар 10520 шайт дон. Вузалӧма — 7.466 шайт дон. Октябрӧдз вӧлі 65 шлен, на пиын 4 нывбаба. Кооперация ёнмӧдан тӧлысьын пырисны шленӧ ещӧ 95 морт, на пиын 39 нывбаба. Став шленыс ӧні 250 морт — нывбаба 53. Быд сё морт пиысь 35 мортыс шленын общественнӧй лавкаын.

Общественнӧй лавкалӧн кык отделенньӧ: Парчӧгын да Сітбарын (Кряжская).

Е. Распутина.