ВИСЕРЫН

(Кулӧмдін уездын)

Нянь таво Висер вӧлӧсьтын воис омӧль. Вӧралӧмысь прӧмыс зэв этша. Сы вӧсна крестьяналӧн сьӧмъяс абуӧсь, олӧны гӧля.

Лавкаясын вузасьӧм мунӧ омӧля жӧ. Крестьяна надейтчӧны вӧлі бур во вылӧ вӧралӧмын да уна босьталісны лавкаясысь тӧвар уджӧн. Ӧні уджйӧзсӧ некыдзи оз вермыны мынтыны. Лавкаясын сетавны водзӧ кежлӧ уджӧн йӧзлы дугдісны. Сы вӧсна ещӧ нин сьӧкыд лои крестьяналы. Кер бердын уджалӧмысь босьтӧм сьӧмӧн крестьяна оз уджйӧзъяс мынтавны, а ньӧбалӧны няньяс, асланыс няньыс уналӧн нин бырӧма да. Сэсся мынтӧны сельхозналог. Сідзкӧ лавкаяслы уджйӧз мынтӧм пыр ӧтарӧ нюжалӧ.

Со кутшӧм вузасян удж тӧргӧвӧй организацияяслӧн февраль 1-ӧд лун кежлӧ.

Нимыс тӧргӧвӧй организацияяслӧн	Вузасьӧм январ тӧлысьын		Воӧны уджйӧзъяс йӧзсянь		Асьныс уджйӧзаӧсь мукӧд тӧргӧв. орган.
	шайт	ур	шайт	ур
Висерса ПО	1370	74	5000	—	Обсоюзлы 10076 ш. 49 ур.
Сюзяыбса „	600	—	5122	—	Обсоюзлы да мукӧдлы 5327 ш. 04 ур.
Пасвомса „	230	41	2923	15	Обсоюзлы 2853 ш. 73 ур.
Госторг	100	—	3000	—	—
«Хлебопродукт»	919	90	6764	18	—