ВЫЛЬ КОКНЬӦДЪЯС ГӦРДАРМЕЕЧ СЕМЬЯЯСЛЫ СЕЛЬХОЗНАЛОГ МЫНТӦМЫСЬ

Ми неважӧн гижлім газетӧ ичӧтик юӧр выль кокньӧд сетӧм йылысь гӧрдармееч семьяяслы сельхозналог мынтӧмысь. Ӧні пасйыштам, кутшӧм кокньӧд сетсьӧ.

Выль кокньӧдъяс со кутшӧмӧсь: гӧрдармееч семьяяс, абу кӧ налӧн видз-муыс да скӧтыс муӧ пӧртӧмӧн унджык куим четверть (¾) десятинаысь морт вылӧ, да абу кӧ налӧн уджалысь мужчинаыс некод гӧрдармееч кындзиыс, налогсӧ мынтӧны сӧмын джынсӧ; гӧрдармееч семьяяслысь, кодъяс уджалӧны му-видз да абу кӧ налӧн уджалан скӧтыс (вӧвъяс), налог налысь ньӧти оз босьтсьы.

Тайӧ выль кокньӧд лӧсьӧдтӧдзыс кӧ налогсӧ гӧрдармееч семьяяс мынтӧмаӧсь нин, налы сьӧмыс бӧр сетсьӧ, либӧ налы позьӧ мӧд вося налогӧ лӧсьӧдны.

Мынтӧм налог бӧр корӧм йылысь либӧ мӧд вося налогӧ сюйӧм йылысь колӧ гижӧд сетны участкӧвӧй налог комиссияӧ. Гижӧдыскӧд тшӧтш колӧ мӧдӧдны окладнӧй лист да квитанцияяс, код серти мынтӧма налог. Тайӧ ставсӧ позьӧ мӧдӧдны Исполком пыр.

Выль кокньӧдъяс йылысь Обласьтувса финансӧвӧй юкӧд ысталіс гижӧдъяс быд фининспекторлы, мед найӧ пырысь-пыр жӧ лӧсьӧдлісны выль кокньӧдъяс, кодъяслы лӧсялӧ. Гижӧдъяс гӧрдармееч семьяяссянь оз ков мыччыны некутшӧмӧс — сэтшӧмъяссӧ фининспектор лӧсьӧдалӧ поселённӧй налог гижӧд кузя, сэсся Исполком пыр юӧртӧ, кодъяслы лӧсялӧма кокньӧдъяс (льготаяс).

Исполкомъяслы колӧ паськыда юӧртны йӧзӧс выль кокньӧд сетӧм йылысь, мед найӧ вермасны водзвыв тӧдны, сетсьӧ али оз налы выль кокньӧдыс, да лӧсьӧдавны документъяс. Сэсся исполкомъяслы колӧ ӧдйӧджык чукӧртны документъяссӧ да ыстыны фининспекторлы.

Кокньӧд сеттӧм вылӧ (позьӧ кӧ, да эз сетны мыйлакӧ) колӧ жалӧба гижны участокса налогӧвӧй комиссияӧ да мӧдӧдны Исполком пыр.