ПАДЖГА ВӦЛӦСЬТЫН

(Сыктыв уездын)

Вунӧдӧмаӧсь.

Крестьянскӧй конференция вылын став делегатъясыс шулісны: быд керка юрысь вайны квадратнӧй аршынӧн пес (сывлӧн ӧкмысӧд юкӧныс) — ломтыны Паджга вӧлӧсьтысь учрежденньӧяссӧ. Коркӧ тайӧ шуӧм кузя Исполкомыс пондіс корны пестӧ, Паджгаса крестьяна эз весиг думыштлыны: со пӧ пес колӧ вайны... Тадзтӧ абу лӧсьыд. Паджгаса, вӧчӧй мый кӧсйысянныд!..

Кредитнӧй тӧвариществоӧ

вайлісны куим порсьпи йоркширскӧй (английскӧй) рӧдысь. Босьтісны куим крестьянин — найӧ кӧсйӧны быдтыны да паськӧдны бур порсь рӧдсӧ вӧлӧсьт пасьтала.

Мӧда-мӧдлы отсасян комитет.

Татшӧм комитетыс миянын лыддьыссьӧ сӧмын бумага вылын, позьӧ шуны — кулӧма дзикӧдз. Шленъяс комитет йывсьыс оз и мӧвпыштлыны. Крестьянскӧй конференция шуліс эськӧ заптыны фонд да, шуӧм кежсьыс бара на коли. Бӧрйӧм ёртъяс эз на чукӧртлыны весиг собранньӧсӧ. Мый бара узьӧны?

Паджгаса мӧда-мӧдлы отсасян комитет, пальӧд ассьыд чорыд унтӧ да сувт чорыдджыка кок йылад!

Крестьяналӧн уджъяс.

Кер лэдзны «Северолеслы» кутчысьӧмаӧсь 360 морт; заводъясӧ мунісны 100 морт, Нювчим заводын уджалӧ морт 150 кымын. Тайӧ нажӧткаяс вылас крестьяна ёна радӧсь.

Сельхозналог

чукӧртӧма 70%. Исполком надейтчӧ став налогсӧ кокньыда чукӧртны. Паджга вӧлӧсьтлы таво вӧлі сетӧмаӧсь налогысь льгота (чинтӧд) 1000 шайт.

Самӧкур пуӧм

чинӧм пыдди — содӧ. Эм кык сикт — Савапиян да Чоййыв, сэні пӧшти быд лун мужикъяс и бабаяс ставыс кодӧсь, рытын петны некытчӧ оз позь — ӧтилаын «мать», мӧдлаын «мать». Ӧтчыд ме аддзылі Савапиян сиктысь: Макар Петыр гӧтыр, Сандрӧ Пиля гӧтыр, Павел Микол гӧтыр, Гриша Мӧда гӧтыр да Ерӧ Ӧксинь — ставныс найӧ кодӧсь, дерт, самӧкурысь.

Колӧ Паджга вӧлӧсьтӧ 3 милиционер, сэки, гашкӧ, чиныштас самӧкурыд.