ӦДЗӦС ВОССИС ПАСЬКЫДДЖЫКА

Январ тӧлысьын Мӧскуаын вӧлі Ставреспубликаса учительяслӧн съезд. Сэки тыдовтчис налӧн сьӧлӧмсьыс босьтчӧм уджавны Сӧвет власьтлы ӧтвылысь коммунист партиякӧд. Торъя ёна сэні тӧдчис — деревняса учительяс окотитӧны пырны коммунист партияӧ.

Сӧмын ӧнӧдз вӧлі бура сьӧкыд партияӧ пырны учительяслы: устав серти, кыдзи служащӧйяслы, колӧ вӧлі корсьны вит поручительӧс вит во партияын уджалысь костысь. Дерт, унджык деревняас сэтшӧм коммунистъясыд этша, мукӧдласьыс весиг оз на и сюр. Сы понда деревняса учительяс пиысь унаӧн эз вермывны партияӧ веськавны (весиг сьӧлӧмысь кӧсйысьяс, водзмӧстчысьяс), кольліны ортсӧ.

Учительяслысь партияӧ пырны окотитӧмсӧ Центральнӧй Комитет Коммунист Партиялӧн пыдди пуктіс да февраль ӧкмысӧд лунӧ лӧсьӧдіс налы зэв ыджыд кокньӧд. Сійӧ со мый шуис:

Партийнӧй организацияяс (ячейкаяс, комитетъяс) местаяс вылын вермӧны примитны партияӧ деревняса учительясӧс, кодъяс петісны крестьяна пӧвстысь да эз на орӧдны крестьянакӧд ӧтув олӧмсӧ (связь), устав серти 2-ӧд категорияӧн (войдӧр вӧлі 3-ӧд категория), мӧд ногӧн кӧ шуны — колӧ сӧмын куим поручитель куим вося шленъяс костысь (3-летний стаж), кандидатын сэсся лыддьысьӧны кык во пыдди — толькӧ ӧтик во.

Дерт, быд учительӧс партияӧ босьтігӧн колӧ бура тӧдмавны: кыдзи сійӧ олӧ, кутшӧма асьсӧ кутӧ крестьяна костын.

Татшӧм кокньӧдсӧ колӧ тӧдны быд коммунистлы да быд деревняса учительлы тшӧтш и миян Коми муын.

Коммунист партия нимкодьпырысь сибӧдӧ ас дінас учительясӧс, кодъяс сьӧлӧмсьыныс босьтчӧны партиякӧд ӧтув югдӧдны пемыд деревняяс. Паськыдджыка воссис налы ӧдзӧс партияӧ пырны. Ӧні тайӧ могыс учительяслӧн ас саяныс.