ПИОНЕРЪЯС ВЕРМЫТӦМ ЙӦЗЛЫ ОТСАЛӦНЫ

Позтыын (Кулӧмдін уездын) пионер чукӧр вӧчліс субӧтник. Ветлісны пилитны пес кык вермытӧм семьялы. Ӧти семьяас сӧмын кык пӧрысь морт, кыкнаныс калекаяс да, асьныс оз вермыны уджавны; мӧд семьяыс гӧлиник дӧва бабалӧн, ас кындзиыс сылӧн уджалысьыс абу жӧ. Субӧтник вылӧ ветлісны 14 пионер да 8 челядь. Пилитісны вель уна пес. Йӧзлы тайӧ уджалӧмыс пионеръяслӧн зэв воис сьӧлӧм выланыс.

Быдлаын кӧ эськӧ тадзи кутасны отсасьны вермытӧм йӧзлы пионер чукӧръяс, ещӧ нин бурджыка на вылӧ видзӧдны кутасны крестьянаыд, ещӧ ӧдйӧ кутас содны да сӧвъявмыны пионер чукӧръясыд.

Пионер Ӧ. М.