ОМӦЛЬ ЛЫДДЬЫСЯН КЕРКА

Кӧтшпомын (Кӧдзвыв вӧлӧсьтын. Сыктыв уездын) куим тӧлысь сайын нин воссьыліс лыддьысян керка. Сӧмын удж нуӧдысьыс — избачыс омӧль веськалӧма да, некутшӧм удж водзӧ оз мун. Том йӧз волывлӧны сӧмын дурны. Корсюрӧ весиг йӧктывлӧны. Олӧма йӧз ньӧтчыд оз пыравлыны лыддьысян керкаӧ, тӧдӧны — сэні омӧль уджыд да. Книгаяс, журналъяс, газетъяс ичӧтика эськӧ эмӧсь, да пӧльзасӧ некутшӧмӧс оз сетны, некод оз лыддьывлы, туплясьӧны весьшӧрӧ пызан вылын.

Избач зэв тшап. Оз позь сыкӧд сёрнитыштны. Юалан сылысь: «Мый нин, Ӧльӧксей Константинович, выльяссӧ гижӧны газетад?» Сійӧ кыввидзас: «Аслад ӧмӧй синъясыд абуӧсь, лыддьы. Ме ог интересуйтчы газетъяснад!» Со колӧкӧ!

Колӧ вежны татшӧм удж нуӧдысьтӧ.

Вильыш.