МЫЙ ГИЖӦНЫ СИБЫРӦ ОВМӦДЧЫНЫ МУНЫСЬЯС

«Югыд туй» газетӧ 258-ӧд номерӧ (колян во декабр 23-ӧд лунӧ) вӧлі гижӧма статья: «Выль местаӧ овмӧдчыны мунӧм йылысь». Сэні вӧлі шуӧма: ӧткӧн-ӧткӧн выль местаӧ мунысьяслы государство отсӧг сетны оз вермы, му-видзьяс выль местаысь оз сетны. Та йылысь ӧні гижӧны письмӧясын да шыӧдчӧмъясын асьныс Сибырӧ овмӧдчыны мунӧм йӧзыс.

1923ʼ воын Сёськаысь (Сыктыв уездысь) Шурганов Ёгор Иван мунлӧма Сибырӧ. Ӧні Обласьтувса Му-видз удж нуӧданінӧ гижӧ: му-видзьяс пӧ эз на сетны. Му-видз лӧсьӧдӧмъяс пӧ мунӧ да, бокысь локтӧм йӧзлы пӧ сетӧны сӧмын коді воӧма сэтчӧ 1922ʼ воӧдз. Бӧръя воӧмъяслы пӧ, кольӧ кӧ юкӧм бӧрти, вӧлисти сетасны. Лоӧ пӧ бӧр локны гортӧ. Шурганов корӧ, мед гортсьыс оз босьтны му-видзсӧ, кодӧс мунігас сетлӧма кӧртымӧн.

Та йылысь Сибырӧ мӧдӧдчысьяслы колӧ мӧвпыштны водзвыв, гортысь вӧрзьӧдчытӧдз. Таво миян Обласьтысь унаӧн мӧдӧдчалӧны мунны Сибырӧ овмӧдчыны. Овмӧссӧ татысь (керка, скӧт, мукӧд кӧлуйяс) кӧсйӧны вузавны, му-видз кӧртымӧн сетны лӧсьӧдчалӧны. Татшӧм йӧзыс тшӧкыда пондісны волывлыны Обласьтувса Му-видз удж нуӧданінӧ юасьны (бӧръя лунъяссӧ волісны морт нёльӧдз-витӧдз).

Вӧлӧсьтса Исполкомъяслы колӧ менам висьталӧм серти чуйдӧдны Сибырӧ овмӧдчыны мунны кӧсйысьясӧс. Мед оз разӧдны ассьыныс гортса овмӧснысӧ, мед босьтчасны чорыдджыка кыпӧдны сійӧс — бурджык лоӧ.

Д. С. Куклин.