ВАЖКУА

(Кулӧмдін уездын)

Волисполкомын уджыс мунӧ шӧркодя. Сельхозналог чукӧртны вермис ставсӧ, мыйта вӧлі колӧ мӧд срок кежлӧ. Исполкомын юралысьыс да секретарыс — коммунистъяс. Сьӧмъяс йӧзлӧн абу, нажӧткаясыс эз вӧвны да. Ӧні кодсюрӧ уджалӧны вӧрын. Воисны Богослов заводӧ ветлысьяс. Заводса нажӧткаясӧн оз ошйысьны.

Кооператив уджалӧ жебиника. Уна вӧлі кольӧм воӧ удждасьлӧма йӧзлы. Став уджйӧзсӧ эз на вермы чукӧртны — йӧзлӧн сьӧмыс абу да. Кооператив ёнмӧдан тӧлысьӧ пырисны выльысь 48 шлен, на пиысь 30 нывбаба. Ӧні став шленыс кооперативын 110 морт.

Лыддьысян керка воссис декабр тӧлысьын колян во. Водзджыксӧ уджыс муніс омӧлика. Ӧні неуна бурджыка мунӧ. Лӧсьӧдісны драматическӧй кружок. Гижсис сэтчӧ 10 морт, джынйыс нывъяс. Сэсся эм му-видз йылысь велӧдчан кружок. Сэні 22 шлен. Удж нуӧдысьыс кружокас — школаын велӧдысь Макаров ёрт. Овлӧны кружокын сёрнияс выль ног му-видз уджалӧм йылысь да скӧт видзӧм йылысь. Сёрни кывзыны волывлӧны кружокӧ гижсьытӧм йӧз вель унаӧн. Сӧмын кружокын этша книгаыс. Лыддьысян керкаын эмӧсь Ленинлӧн да кооперативлӧн пельӧсъяс. Ӧні воссис «Доброхим» да «Мопр» ячейкаяс, пырисны кыкнан ячейкаас 10 мортӧн. «Мопр»-ӧ петалісны ӧктысьны керкаясӧд да, чукӧрмис 10 шайт.

Школаын велӧдчысь рӧштвоӧдз вӧлі 70 морт, зэв этша велӧдчысьяс нывъяс пиысь. Босьтісны рӧштво бӧрын ещӧ 6 нылӧс. Ставыс велӧдчӧ школаын 35 челядь. Велӧдысьяс кыкнаныс комсомолечьяс. Эм школаын пионер чукӧр, ставыс 22 морт.

Став йӧзӧс югдӧдан уджсӧ нуӧдӧны коммунист да комсомол ячейкаяс.

Мак.