ВЕСАЛӦЙ ЛЫДДЬЫСЯН КЕРКАЯС

Воддза коми газетын (видзӧд «Югыд туй» № 37) вӧлі гижӧма Выльгортса лыддьысян керка йылысь: оз пӧ позь сэні лыддьысьны, дурӧны да увгӧны пӧ пыр. Ӧні Сёськасянь (Сыктыв уездын) бара со кутшӧм гижӧд воис: «Лыддьысян керкаын (изба-читальняын) миян некутшӧм удж оз мун. Керка тырыс пыр челядь, дурӧны-горзӧны быттьӧ кабакынӧсь. Гырысь йӧз оз волывны, дай оз и шогмы волывнысӧ: мый пӧ сэтчӧ мунан, — шуӧны, — дурӧмтӧ видзӧдны. Пызан вылас туплясьӧ кык-куим газет, ставсӧ нямралӧмаӧсь-чукралӧмаӧсь, оз нин шогмы лыддьыныс. Эмӧсь ӧд эськӧ, йӧзлӧн моз, избач и волполитпросвет да, оз и думыштлыны найӧ лыддьысян керка йывсьыд».

Ми чайтам, паськыд Коми муад бура уна на татшӧм «дуран керкаясыд» эмӧсь.

Сы вылӧ ӧмӧй нӧ лыддьысян керкаяссӧ восьталӧны? Некытчӧ шогмытӧм татшӧм «уджыд»!

Мый нӧ, збыльысь, видзӧдӧны волполитпросветъясыс? Оз ӧмӧй аддзыны лёк вӧчӧмсӧ асланыс ныр увсьыныс?

Дас коймӧд съезд Россияса коммунист партиялӧн мый шуис лыддьысян керка йылысь? Кымынысь нин ми та йылысь гижлім газетӧ?

Али некодлы оз инмы гижӧдыс, али нарошнӧ оз кӧсйыны вӧчны бурасӧ, сувтӧдны прамӧя лыддьысян керкаяссӧ?

Лыддьысян керкаяс колӧны лоны сиктъясын-грездъясын велӧдчан-югдӧдчан позйӧн. Лыддьысян керка бердӧ колӧ ӧтувтчыны став культурнӧй удж нуӧдысьяслы. Сэні колӧ пемыд крестьянаӧс велӧдны, туйдӧдны бур олӧмӧ, висьтавлыны налы Сӧвет власьтлысь да коммунист партиялысь уджъяс вӧчӧмсӧ, писькӧдчӧмсӧ, мырсьӧмсӧ, уджалысь йӧз дор тӧждысьӧмсӧ. Со мыйла восьталӧны лыддьысян керкаястӧ. Увгыны да дурны сэні оз позь. Мед, кодлы колӧ, дурасны ывлаын — ӧні лым вылын небыд, гожӧмын — шоныд дай...

Нолтӧ, волполитпросветъяс тшӧтш велӧдчӧмджык уджалысьяскӧд, весалӧй лыддьысян керкаяснытӧ лёк ёгсьыс, чышкӧй-петкӧдӧй сэтысь быдсяма дурсӧ-увгӧмсӧ! Мед вӧлі лыддьысян керкаыд вывсяньыс и сьӧмӧссяньыс пельк — югъялӧ!