ВЫЛЬГОРТЫН

Олӧм ловзис.

Колян рӧштвосянь ӧнӧдз на олӧм быттьӧнӧсь ловзис. Зэв унаысь вӧчавлісны собранньӧяс, докладъяс, рытъяс, спектакъяс. Уджалысьяс войдӧрсӧ вӧліны карса совпартшколаысь, тшӧтш ӧтув татчӧс велӧдысьяскӧд, комсомолечьяскӧд. Воссис нывбаба делегатка чукӧр. Чукӧртчывлісны нин куимысь кымын, кывзісны докладъяс, сёрнитісны унатор ас олӧм йывсьыныс. Ӧти рыт Сыктывдінкарса бурдӧдысь т. Шушков лыддис налы доклад «лёквисьӧм йылысь (о сифилисе)», картина петкӧдлӧмӧн висьӧм йылысь.

Ӧні сэсся гаж вӧчӧны военнӧйяс: кор велӧдӧны допризывникъясӧс (морт кыксё), кор найӧ сьылӧны, кор спектакъяс сувтӧдӧны — ёна гажӧдӧны.

Тайӧ быдӧн эськӧ буртор, лӧсьыд, но

Зэв абу лӧсьыд

ӧтитор. Эм вӧлӧсьтас лыддьысян керка; пыран сэтчӧ да зэв эськӧ гажа: гӧгӧр ляскалӧма портретъяс, картинаяс да плакатъяс, эм и «Ленинлӧн пельӧс», да, пӧжалуй, бур мортлы овнысӧ оз позь, он и тӧд, мый сэні вӧчсьӧ: увгӧны, сералӧны, котралӧны, вермасьӧны, кутчысьлӧны том йӧз, сӧрӧны, куйлӧны скамья вылас, сьылӧны, куритчӧны, сёйӧны; сэні жӧ собранньӧяс мунӧны комсомолъяслӧн, Мопрлӧн, долой неграмотностилӧн, мукӧдлӧн; сэні жӧ лӧсьӧдчӧны ворсны спектак вылын, джодж шӧрас кӧрт пач ломтысьӧ, чадитӧ — некутшӧма оз позь лыддьысьны. Ӧтпыр шуны: быттьӧкӧ кутшӧмкӧ трактир ли, кабак ли, кодъяс вӧвліны сар дырйи. Лыддьысян керка нимыс дзикӧдз нин вошӧма. Колӧ кыдзкӧ лӧсьӧдны, мед вӧлі либӧ лыддьысян керка, либӧ пӧртны сійӧс клубӧ, нардомӧ — кодыскӧ ӧтикыс. Сэтшӧм гудыр-гадырӧн лыддьысян керкаын некутшӧм буртор оз вермы лоны и некод оз понды пыравны лыддьысьӧм могысь. Тӧдӧ оз бара сэтшӧм оласногсӧ волполитпросветкомыс-а? Дерт, буракӧ, некод оз видлыв.

Велӧдчысь.