ОМӦЛЬ НАРДОМ КӦРТКЕРӦСЫН

(Кулӧмдін уездын)

Зэв нин ёна миян ошкисны: со пӧ сійӧ да сійӧ вӧчӧны, удж пӧ ёна мунӧ. Дерт, ортсысянь кӧ видзӧдлан, быттьӧ зэв бура уджалӧны. Вӧчӧма Ленин пельӧс, крестьянин керка. Сӧмын тай налӧн вывесканыс-а. Пыдӧджык кӧ да гӧгӧрбок видзӧдлан, ошкыны лоӧ нинӧмысь.

Быд лун ломтысьӧ кык зэв ыджыд лампа, карасиныс мунӧ пунт 5 рытнас. Ломтӧны 5 кымын пач. Быд лун волӧны том йӧз морт 40−50. Сӧмын оз лыддьысьны — дурӧны да йӧктӧны. Некутшӧм кружок абу лӧсьӧдӧма. Весиг оз и мӧвпыштны сы йылысь. Газет воӧ зэв уна, сӧмын лыддьӧмас оз волывлы, туплясьӧ кодыс джоджын, кодыс шкап вылын. Дерт, уджавны кӧ босьтчас удж нуӧдысьыс — Барабанов, вермас, сӧмын мыйлакӧ оз кӧсйы. Тайӧ зэв омӧль. Колӧ неуна садьмӧдчыны да босьтчыны уджавны.

Сизь.