КОЛӦ СУДЗӦДНЫ БУР КӦЙДЫС. КОЛӦ ӦТУВ УДЖАВНЫ

Матысмӧ тулыс. Он и тӧдлы — воас кӧдзан кад. Миян нывбабаяс кутасны корсявны уна пӧлӧс пуктас кӧйдысъяс: шабді, капуста, сёркни да мукӧд пӧлӧсъясӧс. Мукӧддырйи найӧ сетлывлӧны ветлысь-мунысьлы медбӧръя сьӧмсӧ кӧйдыс вылӧ, сӧмын пуктас кӧйдыс пыдди сюрлывлӧ кутшӧмкӧ тӧрича. Колӧ нывбабаяслы корсьны бур кӧйдысъяс. Сэтшӧм кӧйдысъяссӧ позьӧ судзӧдны обласьтувса му-видз удж нуӧданінысь. Ӧтувтчӧмӧн кӧ судзӧдны, оз и уна сувт. Сэсся ӧткӧн-ӧткӧн уджалӧмӧн нывбабалы уджалӧм дон мындаыс пуктасыс оз во. Босьтам шабді. Нывбаба мыйта вын пуктӧ сійӧс вӧдитӧмӧ, кватитчан да, воӧ сӧмын комын кымын аршын дӧра. Уджсӧ кӧ артавны, ӧти аршын дӧра сулалӧ шайтӧн-джынйӧн гӧгӧр. Ситеч аршынлӧн доныс сӧмын 40 ур. Ӧтувтчӧмӧн кӧ эськӧ вит-ӧ-квайт нывбабалы вӧдитны шабдітӧ, позьӧ судзӧдны машина (шуам, нирасян машина) — дай сэки этшаджык вын мунас дай шабді позьӧ унджык вӧдитны. Колӧ нывбабаяслы та йылысь бура мӧвпыштны да ӧтув босьтчыны вӧдитны кӧдзаяс, пуктасъяс.

Пр.-Кан.