ЧУКСАСЬӦМ КОМИ АНЬЯСЛЫ

Коми аньяс, зэв на ми пемыдӧсь. Тыдов коластӧн йӧз бӧрысь, олӧм бӧрысь вӧтчам. Дыша ветлӧдлам собранньӧяс вылӧ, лыддьысян керкаясӧ. Велӧдчыны огӧ кӧсйӧ. Асьным ми мӧвпалам: «Олӧма йӧзлы кутшӧм али велӧдчӧм пӧра кольӧм бӧрад. Абу ӧд челядьяс, дай уджтӧ он эновт».

Коми аньяс, вайӧ жӧ сійӧ мӧвпалӧмтӧ шыбитамӧй, миян пӧра абу на кольӧма, ми ӧд самӧй на олысь йӧз, томлы кӧть пӧрысьлы син-пельыс ӧткодя колӧ. Сёрни-баснинад да войпукнад пӧраыс унджык на кольӧ. Вайӧ босьтчыламӧй велӧдчыны школаясын да собранньӧяс вылӧ ветлывлыны. Сэні быд бурсӧ висьтавлӧны, миянӧс югдӧдӧны: велӧдӧны, кыдзи колӧ овны, видз-му уджавны, скӧтӧс видзны, челядьӧс быдтыны, кыдз эськӧ миянлы кокньыд да долыдджык лоӧ овны, нэм коллявны.

Дугдамӧй поплысь ноп тыртны, вайӧ ӧттуйӧд кутамӧй югыдлань мунны: велӧдчыны, пемыдлун пӧдтыны. Дона ёрт Ленин шуліс: «Ог кӧ ми асьным олӧмнымӧс кокньӧдӧ, некод миянлы оз кокньӧд». Коми аньяс, ӧні миянлы позьӧ, кольыштлам став уджнымӧс, уськӧдчылам велӧдчыны, час-мӧднад огӧ на ёна манитчӧй, унджык на пӧратӧ воштывлам самӧкуртӧ пуигӧн да баба чукӧрын юигӧн.

Мужикъяс видӧм-дӧзмӧм вылӧ огӧ кутӧ видзӧдны. Бӧрыннас асьныс казяласны. Велӧдчӧмысь омӧль оз ло.

Челядьлы детскӧй сад восьтамӧй. Бура велӧдысьӧс корамӧй, мед челядьным ворсігмоз выль ногӧн овны велаласны, найӧ сэні юр вежӧр югыдлань аддзасны. Вайӧ жӧ, коми аньяс, ӧттуйӧд вӧчамӧй.

Делегатка Иван Анна.