МЫЙЛА ОЗ КӦСЙЫНЫ ВӦЧНЫ

Миян Сӧвет власьт вӧчсьӧ улісянь (снизу): первой сельсӧвет, сэсся вӧлӧсьтувса сӧвет, сы бӧрын — районнӧй либӧ уездувса, водзӧ — губерняувса либӧ обласьтувса, бӧрвылас — Ставреспубликаса. Со кыдзи.

Войдӧр, сар дырйи, вӧлі мӧдногса: мый вӧлі сар шуас — сідзи и лоӧ вӧлі вӧчны (власьтыс вӧлі вылісянь). Вӧвлі эськӧ Государственнӧй Дума да, сійӧ вӧлі сӧмын сар власьтлы сайӧд пыдди; сэсся сэтчӧ гӧль крестьянаыд да рабочӧйяс эз бӧрйыссьывны: найӧ пӧ (шуӧны вӧлі сэки) оз вермыны «государственнӧй дум» думайтны...

Ӧні власьтыс ставнас рабочӧй да крестьяна киын. Асьным аддзам, вермӧны оз найӧ государственнӧй думтӧ думайтны. Кӧкъямысӧд во нин ми асьным лӧсьӧдам аслыным бур олӧм, непӧштӧ «думайтам» — вӧчам, дорам ӧтвылысь, ӧти туйӧд мунам, паськӧдчам, кыпӧдчам. Со кыдзи.

Сӧмын оз на миян Коми муад быдлаын ӧтмоза уджавны вӧлӧсьтувса исполкомъясыд. Ӧтиласянь-мӧдласянь гижӧны миянлы: миян пӧ исполком оз уджав сьӧлӧмсьыс, оз сулав крестьяна дор, оз вӧч Сӧвет власьт индӧм серти. Норасьӧны унаӧн: миян пӧ исполком неладнӧ налог (сельхозналог) сюйис, миян пӧ оз видзӧдны гӧрдармеечьяс семья вылӧ — оз сет некутшӧм кокньӧд налогысь (Краснобор, Изьваын), а миян пӧ исполкомыд дзикӧдз «бюрократитчӧма», оз пӧ йӧзыдкӧд весиг сёрнит (Сёськаын, Сыктыв уезд). Висерын весиг Сӧветсӧ лӧсьӧдӧмаӧсь йӧзӧн бӧрйытӧг... Унатор воӧ миянлы быдсяма неладнӧ йывсьыс.

Сӧвет власьт ӧні сетіс волисполкомъяслы ыджыд права, вермӧны унатор асьныс вӧчны. Сӧмын вӧчнысӧ колӧ рабочӧя-крестьяна государстволы пӧльза вылӧ.

Сӧвет власьт тӧждысьӧ кыдз-мый вермӧ крепитны уліса сӧветскӧй удж нуӧданінъяс, содтӧма весиг сэні уджалысьяслы жалӧванньӧ.

Колӧ жӧ нин гӧгӧрвоны: вӧлӧсьтувса власьт Сӧветскӧй государстволӧн кок улыс (подулыс); омӧль кӧ подйыс, катласьӧ кӧ сійӧ — Сӧвет власьт став тушанас оз вермы чорыда сулавны.

Ми пыр шулім, дай ӧні на шуам: колӧ исполкоманыд бӧрйыны вежӧра, сьӧлӧмысь уджалысь йӧзӧс.