МАРТ 8-ӦД ЛУН КЕЖЛӦ

Матысмӧ ставмувывса нывбабаяслӧн праздник лун — март 8-ӧд лунӧ.

Тайӧ праздниксӧ лӧсьӧдӧма вӧлі дас вит во сайын — 1910-ӧд воын, Клара Цеткин шуӧм кузя.

Тайӧ праздникыс — став му пасьтала нывбабаяслӧн ӧтувтчан лун. Таво дас витӧдысь нин нывбабаяс петкӧдласны ассьыныс водзмӧстчӧмнысӧ, выннысӧ.

Мый колӧ вӧчны тайӧ лунӧ?

Миян Сӧвет Республикаын нывбабаяс ӧткодь правааӧсь мужикъяскӧд. Сӧмын уджалысь нывбабаяс (роботничаяс) ёна водзын мунӧны крестьянкаясысь. Крестьянкалӧн уджыс унджык — видз-му дорын да кӧзяйство гӧгӧр. Прӧст пӧраыс сылы этша, велӧдчыны оз вермыв. Сы понда крестьянка и бӧрынджык мунӧ роботнича дорысь, торъя нин бӧрын миян коми крестьянка.

Колӧ тайӧ лунӧ висьтавлыны крестьянкалы, кутшӧм права сылы сетіс Сӧвет власьт. Колӧ висьтавны: ӧні нывбаба вермӧ ӧткодя мужикъяскӧд бӧрйысьны быд удж бердӧ; колӧ восьтыны нывбабалы туйсӧ — ӧтвылысь стрӧитны Сӧветса государство; колӧ сибӧдны быдлаӧ, медым велӧдчис тшӧтш быдсяма удж нуӧдны, — оз ков вунӧдны Ленинлысь шуӧмсӧ: «Колӧ вӧчны сідзи, медым весиг быд кухарка кужис веськӧдлыны Сӧветса государствоын».

Сиктъясын, грездъясын колӧ водзвыв (праздникӧдзыс на) чукӧртлывлыны нывбабаясӧс да висьтавлыны налы ставсӧ, мый сетіс налы Сӧвет власьт, кыдзи колӧ овны налы, мый колӧ вӧчны. Праздник лунас колӧ вӧчавны нывбабаяс собранньӧяс, тӧдмӧдны сэні, мый вӧсна лӧсьӧдӧма тайӧ праздниксӧ, кутшӧма олӧны нывбабаяс миянын, мукӧд государствоясын; мый вӧсна вермасьӧны роботничаяс да крестьянкаяс озыр государствоясын; мыйла колӧ миянлы отсасьны тшӧтш мукӧд государствоса нывбабаяслы.

Став вӧлӧсьтса, сиктса либӧ грездса удж нуӧдысьяслы — торъя нин коммунистъяслы, комсомолечьяслы да культурнӧй удж нуӧдысьяслы — колӧ сьӧлӧмсянь босьтчыны нывбаба костын уджавны. Мед некӧн эз коль весиг ӧтик нывбаба ассьыныс правасӧ тӧдтӧг! Мед быд нывбаба тӧдӧ вӧлі, кутшӧма олӧны налӧн чойясыс мукӧд государствоын, мый понда найӧ вермасьӧны озыръяскӧд.

Коми му пасьтала водзмӧстчысь войтыр, лӧсьӧдчӧй ставмувывса нывбабаяслӧн праздник лун кежлӧ!