ПИОНЕРЪЯС ЙЫЛЫСЬ

Коми муын тэрыба содӧ пионер чукӧръяс. Кольӧм во та кадын вӧлі сӧмын ӧти чукӧр миян Сыктывдінкарын. Владимир Ильич Ленин кулӧм бӧрын пионер чукӧръяс кутісны ӧдйӧ быдмыны, паськавны. Таво тӧвнас пӧшти быд школаын велӧдчысь челядь сёрнитӧны пионер чукӧрӧ пырӧм йылысь. Сӧмын ӧтувтныс челядьсӧ да уджсӧ на пиын кыдзи колӧ нуӧдны ми огӧ на вермӧй, комсомол ячейкаясыс абу на быд деревняын да. Школаясын велӧдысьяслы колӧ отсавны комсомолечьяслы уджсӧ нуӧдны пионер чукӧръясын.

Владимир Ильич кулӧмлы во тыригкежлӧ Коми муын пионер чукӧрӧ ӧтувтчӧма челядь 1300 морт. Лыддьыны кӧ став ӧтувтчӧм челядьсӧ пионерскӧй группаясӧ, матысмӧ кык сюрс кымынӧ. Сӧмын найӧ ставныс оз на лыддьысьны пионерӧн, найӧ велӧдчӧны на пионернас лоны. Пионерӧн ми шуам сӧмын кодъяс сетӧмаӧсь нин пионерскӧй присяга,^* Присяга — кӧсйысьӧм./^ кодъяс кӧсйысьӧмаӧсь В. И. Ленин туйӧд став уджалысь йӧз водзын мунны. Пионеръяс присягасӧ сетӧны чукӧрӧн собранньӧ вылын либӧ пионер рыт вылын. Присяга лыддьыссьӧ со кыдзи:

«Ме, том пионер, став уджалысь йӧз водзын талунъя лунсянь кӧсйыся: чорыда сулавны уджалысь йӧз дор, пуктыны ассьым вынӧс ставмувывса рабочӧй да крестьянаӧс озыр дзескӧдысь йӧзысь мездӧм вылӧ. Кута веськыда мунны Владимир Ильич Ленин туйӧд; овны сійӧ велӧдӧм ногӧн да асланым пионеръяс законъяс да обычайяс серти».

Присяга бӧрын пионерлы сетсьӧ галстук да значок. Сы бӧрын пионер лыддьыссьӧ шленӧн став му вылын коммунист ногӧн олысь челядьлӧн ӧтувтчӧм чукӧрысь.

П.