НЕМДІН ВӦЛӦСЬТЫН

(Кулӧмдін уездын)

Исполкомын.

Юралысь да сылӧн отсасьысь коммунистъяс уджалӧны бура, крестьяна на вылӧ нинӧм оз шуасьны. Налог ӧнӧдз перйӧма 50%. Исполком ас тшӧт вылас кутӧ мельнича.

Епо

уджалӧ бура. Лавка тӧварӧн дзик тыр, эм быдтор. Кодсюрӧ шуасьӧны, дона пӧ тӧварыс сэні. Вӧралӧм прӧмысъяс вайӧны бура уна. Ноябр 1-ӧд лунсянь декабр 15-ӧд лунӧдз прӧмыс да кукань ку чукӧртӧма нёль сюрс да вит шайт дон. Уджӧн Епоыс войдӧр уна босьтасьлӧмаӧсь. Уджйӧзыс шленъяссяньыс да кыйсьысьяссянь воӧ вит сюрс шайт. Шленыс ставыс 239 морт.

Мукӧд лавкаясын.

Вӧлӧсьтын эм ещӧ кык лавка: Госторг да Хлебопродукт. Уджыс сэні мунӧ бура жӧ.

Велӧдчӧм-югдӧдчӧм.

Вӧлӧсьтын эм вит школа. Сэні сизим велӧдысь. Велӧдӧм мунӧ бура. Эм ещӧ нардом, лыддьысян керка, корсюрӧ овлӧны спектакъяс. Спектак вылӧ волӧны уна йӧз. Ӧні бара рыт велӧдӧны гырысьӧс грамотаӧ, сэтысь нинӧм некод оз шуась. Вӧлӧсьтсянь эм деревня Краснояр да комын вит верст сайын деревня Джеджим-парма, сэні школаяс абуӧсь.

Вӧр лэдзӧм.

Северолеслы лэдзӧны кер, кутчысисны сы вылӧ уна крестьяна. Ёна локталісны кер лэдзны Чердінса уездсянь, сэні пӧ нажӧткаыс оз сюр да. Кер лэдзӧны ещӧ Англолеслы.

Вӧлӧсьтын эм пельшӧр да акушерка. Пельшӧр Тимушев уджалӧ кык вӧлӧсьтын: Немдінын да Мысын. Ӧтнаслы зэв сьӧкыд, пыр ӧтилаӧ да мӧдлаӧ новлӧдлӧны. Висьысьяс уна, ӧні висялӧны скарлатинаӧн да биа висьӧмъясӧн.

Иван Кирӧ.