КРЕСТЬЯНАЛӦН КОНФЕРЕНЦИЯ ПОМӦСДІНЫН

Январ 10−11-ӧд лунъясӧ Помӧсдінын вӧлі крестьяналӧн конференция. Делегатъяс чукӧрмылісны дас ӧти деревняысь 79 морт. Сэсся вӧліны уна кывзысь йӧзыс. Ставыс вӧлі 150 морт гӧгӧр.

Сёрнияс вӧліны: ставмувывса да СССР-ын олӧм йылысь, волисполкомын уджалӧм йылысь, мӧда-мӧдлы отсасян комитетын удж кыпӧдӧм йылысь, йӧзӧс велӧдӧм йылысь, кооперация йылысь, кредитнӧй тӧвариществолысь уджалӧмсӧ дай удж лӧсьӧдӧм йылысь. Му-видз уджалӧм йылысь дай мукӧдтор йылысь.

Ставмувывса да СССР-ын олӧм йылысь кывзӧм бӧрын конференция шуис: «Сӧвет власьт уджсӧ нуӧдӧ веськыд туйӧд, ёна тӧждысьӧ рабочӧйяс да крестьянаяс вӧсна. Сы кузя колӧ отсавны мыйӧн верман Сӧвет власьтлы, медым бурджыка лӧсьӧдас сійӧ олӧмсӧ».

Исполкомлысь удж нуӧдӧмсӧ ошкисны. Мӧдысь кежлӧ шуисны исполкомлы бура видзӧдны налогъяс пукталігӧн. Ёна сёрнитісны йӧзӧс велӧдӧм йылысь. Шуисны корны мӧд во кежлӧ восьтыны Помӧсдін вӧлӧсьтын ещӧ куим школа: Сордйылын, Югыдтыдорын да Пузлаын. Страхуйтӧм йылысь шуисны — обязательнӧй страховкасӧ пӧ колӧ ӧдйӧнджык нуӧдны. Сэсся ас окотанас страхуйтӧмъяссӧ колӧ жӧ вӧчны, медым ыджыд ускӧттьӧ лоигӧн вермам бӧр ассьыд олӧмтӧ лӧсьӧдны.

Йӧзыс дзоньвидзалун вӧсна ёна тӧждысьӧны. Пельшӧр вӧлӧсьтын ӧти да оз вермы быдӧнлы отсавныд, кор колӧ отсӧгыс. Сы кузя тшӧктӧны-корӧны восьтыны приёмнӧй покой дай корны ещӧ ӧти пельшӧрӧс.

ОДВФ, Доброхим да МОПР йылысь кывзӧм бӧрын шуисны отсӧгъяс сетны кыдзи коді мыйӧн вермас.

Кооперация йылысь висьталӧм кывзӧм бӧрын ёна сёрнитісны, быд боксянь помӧсдінса кооперацияӧс видлалісны, шуисны: «Кооперация вынсьӧдӧмӧн вермам регыдджык мынтӧдчыны спекулянтъясысь-купечьясысь. Сэсся ассьыным олӧмнымӧс вермам бурджыка кыпӧдны дай тӧвар дон чинтыны. Сы кузя кооперация бердӧ колӧ кутчысьны, отсавны сылы кыпӧдчыны шленӧ пырӧмӧн».

Му-видз уджалӧм йылысь прамӧй бура мӧвпалісны, сёрнитісны. Ӧнія, важ ногӧн уджалӧмысь тшӧктӧны эновтчыны. Выль ногӧн пӧ уджавны колӧ. Шуисны тӧварищество пыр унджык судзӧдны быдсяма пӧлӧс турун да пуктас кӧйдысъяс дай машинаяс.

Конференция вылын став делегатыс быдтор йылысь сёрнитісны ёна бура. Шуисны, мӧдысь кежлӧ пӧ колӧ вӧчны конференциятӧ тшӧкыдджыка.

Митрей Прокӧ.