КЫДЗИ КУТАС БОСЬТСЬЫНЫ ЛОКТАН ВОӦ СЕЛЬХОЗНАЛОГ
Сӧвет власьт да коммунист партия зільӧны воысь воӧ сувтӧдны бурджыка му-видз уджалысьяслысь налог босьтӧм, лӧсьӧдны сідзи, медым эськӧ налогыс вӧлі овмӧс дон серти, медым налогыс отсаліс крестьяналы бурмӧдны да ёнмӧдны му-видз уджалӧм, медым налогыс, ӧтарӧ-кӧ, эз вӧв сьӧкыд крестьяналы, мӧдарӧ-кӧ, сетіс отсӧг государстволы удж нуӧдны да овмӧссӧ кыпӧдны.
Сельхозналог босьтӧм таво колян восяяс серти вӧлі бурджык нин. Сӧмын эз на вӧв дзик гӧгӧрбок лючки, колі на сувтӧдны ещӧ лӧсьыдджыка. Сэтшӧм лӧсьӧдӧмъясыс и лоӧны локтан вося налог босьтӧмын. Ставсӧ, гӧгӧрбок мӧд вося налог йылысь висьтавны он на вермы. Сӧмын верман медглавнӧйсӧ.
Медвойдӧр — локтан вося сельхозналог тавося налог серти колӧ чинтыны, лӧсьӧдны этшаджык. Ёна-ӧ позяс чинтыны, ӧні он на вермы висьтавны. Сӧмын шуам — налог чинтігӧн лоӧ видзӧдлыны государствоса рӧскодъяс вылӧ. Рӧскодыс государстволӧн абу на этша. Куш Гӧрд Армияӧс видзӧм вылӧ петӧ сылӧн 400 миллион шайт. Кӧть и уна эськӧ рӧскодыс, сельхозналог мыйкӧ мында лоӧ чинтӧма.
Сэсся локтан во налог колӧ босьтны дзик нин овмӧс серти да нажӧтка серти. Тавося налог вӧлі пуктыссьӧ му-видз да скӧт лыд серти. Тадзинад вӧвлі сэтшӧмторъяс, мый ӧти крестьянинлӧн му-виддзыс этша, да мукӧд уджысь нажӧтка босьтӧмӧн бурджыка олӧ сы дорысь унджык му-виддза крестьянинысь, налогсӧ мынтӧ этшаджык. Мӧд во налог пукталігӧн кутасны видзӧдны оз куш му-видз да скӧт вылӧ, став овмӧсыс вылӧ да нажӧткаяс вылӧ видзӧдласны. Кымын унджык крестьянинлы воӧ доходыс, сымын сійӧ налогсӧ кутас мынтыны унджык. Кымын этша доход, сымын налог чинӧ да чинӧ. Ёна кӧ нин этша крестьянинлы аслас овмӧсысь да уджысь воӧ доходыс, сэтшӧмыслысь налогтӧ дзикӧдз оз кутны босьтны. Лоӧ лӧсьӧдӧма водзвыв медічӧт доходыс кӧзяйствоын, кодысь оз нин кут босьтсьыны налог; лӧсьӧдӧма сідзи, медым налогысь позис дзикӧдз мездыны став СССР пасьта квайт миллион кымын кӧзяйство.
Крестьянинлы колӧ висьтавны водзвыв, мыйта сылӧн кутас перйыссьыны налогыс, медым эськӧ крестьяниныс зіляс бурмӧдны ассьыс овмӧссӧ.
Миян колӧ вӧлӧсьтса бюджет ёнмӧдны, содтыны. Медуна вӧлӧсьтса бюджетлы вермам сетны сельхозналогысь.
Таво сельхозналог бердын содтӧдыс (надбавкаыс) вӧлі 37%. Татысь эз на став 37% сетсьыв вӧлӧсьтса бюджет вылӧ. Локтан вося налогын содтӧдыс лоӧ 50% кымын став налогсьыс дай сійӧ содтӧдсьыс вӧлӧстнӧй бюджетӧ кутас сетсьыны джынйыс.
Локтан вося налог йылысь декретыс петас локтан тулысын. Декрет серти быд крестьянин вермас тӧдны тулысын нин, уна-ӧ сы вылӧ воны кутас налог, сы серти лӧсьӧдны аслыс овмӧс да корсьны доход.
