ВЕСАВНЫ КОЛӦ

Ми «Югыд туй» газетын колян тӧлысьӧ гижлім нин Саваягса (Кулӧмдін уездса) Илля Вась Иван йылысь. Гижліс Скиталец. Илля Вась Иван шленын волисполкомын, юралысьын му-видз удж нуӧдан комиссияын. Сӧмын сэні некутшӧм удж оз нуӧд. Сэсся сійӧ «кузь киа» (гусясьӧ). Сӧвет власьтӧс да коммунист партияӧс зэв оз радейт. Йӧзыс сійӧн матӧ нин воӧмаӧсь. Ӧні Синма-пеля бара юӧртӧ тайӧ морт йылысь:

Илля Вась Иван лекарствоӧн юкталӧмӧн виӧма нарошнӧ мӧскӧс ӧти гӧль дӧвалысь. Дӧваыд сетас сыысь судӧ. Сэсся ӧні сійӧ керкасьыс ыджыда оз лысьт петавны. Илля Вась Иван пӧ кӧсйӧ вины сійӧс. Илля Вась Иванлӧн чойыс висьтавлӧма сылысь гусясьӧмъяссӧ да мӧс виӧмсӧ. Сыысь Илля Вась Иван чойсӧ пыр кок улас талялӧ: «Виа пӧ тэнӧ понйӧс моз». Январ тӧлысьын коммунист ячейка вӧчлӧма вӧлі беспартийнӧй конференция. Илля Вась Иван локтӧма сэтчӧ код юрӧн да кутӧма увгыны да ёрччыны. Йӧзыслы лоӧма сы вӧсна разӧдчыны конференция вылысь.

Синма-пеля тшӧктӧ весавны Саваягсӧ тайӧ мортысь.