КЫДЗИ ИВАН ЛУКИЧ ЧУЖӦМСӦ ДЕРЕВНЯЛАНЬ БЕРГӦДІС

— Да... Ӧні 13-ӧд съездсянь миян партия бергӧдчис став чужӧмнас деревнялань. Ӧні ёна-ёна колӧ уджавны сэні. Сэсся ӧд бара жӧ со Сӧветъясын удж бурмӧдӧм вылӧ ёна ӧні босьтчим. Сэсся... Ме, нинӧм шуны, деревняыдлы бура уна нин вӧчи дай вӧча водзӧ. Аски бара «сявкнита», бара ичӧтика буртор сетышта. Ичӧтика кӧть, да ӧд пыр жӧ нин водзӧ мунӧ, оз бӧрӧ.

Тадзи мӧвпалӧ Иван Лукич Григорьев бумага лист водзын пукалігмоз. Мӧвпалӧ рочӧн. Сӧмын ме татчӧ комиӧн гижа-а.

Иван Лукич лӧсьӧдчӧ доклад вӧчны. Корсялӧ кывъяссӧ, мед эськӧ мичаджыка шуны. Гижӧ тезисъяс аслас докладлы. Аскинас мӧдӧдӧны сійӧс РКП (б) ячейкасянь деревняӧ Ленин ёртлысь кулан лунсӧ казьтыштны. Иван Лукич партиялысь лозунгсӧ «чужӧмӧн деревнялань» гӧгӧрволіс сӧмын ӧти ног: ветлыны деревняӧ, «сявкнитны» доклад, ковмас кӧ, сералыштны йӧз водзын волисполкомлысь уджалӧмсӧ, петкӧдлыны ассьыс сюсьлунсӧ йӧз водзын, шуны: «тіян тай тані некод оз куж уджавны». Иван Лукич оз вӧлі радейт волисполкомкӧд, комсомол ячейкакӧд ӧтвыв, водзвыв сёрнитӧмӧн удж деревняын нуны.

Иван Лукич деревняын нин. Тшӧктіс волисполкомса юралысьлы чукӧртны йӧзӧс, тшӧктіс висьтавны — карысь пӧ локтіс морт.

— Локтіс доклад вӧчны, крестьянаӧс югдӧдны, деревняӧс каркӧд ӧтувтны.

Волисполком да комсомол ячейка собранньӧ йылысь эськӧ вӧлі юӧртӧмаӧсь нин йӧзсӧ, да Иван Лукич мӧд пӧв тшӧктіс. Мед пӧ унджыкӧн локтасны йӧзыс.

Крестьяна локтісны зэв унаӧн. Дзик волисполком тырыс лои. Чуньыд некытчӧ оз тӧр — сэтшӧм дзескыд. Крестьяна радейтӧны Ленин ёртӧс, сӧмын тӧдӧны вӧлі этша сы йылысь; сӧмын Ленин ёрт пӧ гӧль йӧз дор сулалысь. Налы колӧ вӧлі тӧдны унджык, ставсӧ Ленин ёрт йылысь.

Иван Лукичлӧн сьӧлӧмыс нимкодясьӧ. Вот «сявкнитас» талун мортыд! Босьтіс кыв аслыс медводдза мортӧн.

— Дорогие товарищи! В сегодняшний день ровно год тому назад пролетариат...

— Комиӧн нӧ мый он висьтав! — кодкӧ йӧзсянь шыасис.

— Комиӧн, комиӧн! — унаӧн шыасисны.

— Энӧ торкӧй менӧ. «Мысльясыс» вошӧны. Коминад ог. Мисьтӧма артмӧ. Коминад мый висьталӧмсьыс. Рочнас тыкӧ кывзӧй-а...

Ичӧтик кост. Шы ни тӧв.

— Дорогие товарищи! Ровно год тому назад пролетариат не только Союза Советских Социалистических Республик, но и всего мира, всего земного шара потерял своего вождя, ровно год тому назад склонились знамена над свежей могилой нашего незабвенного, нашего дорогого вождя Владимира Ильича Ленина.

— Ленин йылысь, Ленин йылысь! — вашкӧдӧны йӧз ас костаныс.

— Товарищи, почтимте же память его...

— Чеччӧй, чеччӧй... Микул, шапкатӧ босьт!...

— Садитесь... Вам, конечно, не безызвестен один доминирующий завет, оставленный Ильичом, завет об укреплении всеми силами союза рабочих и крестьян...

Доклад помасигкежлӧ вежӧсын йӧзыд зэв этша кольӧ. Иван Лукичлы ёна забеднӧ лоӧ. Скӧрмас быдсӧн.

Кыдзи нӧ на! Сійӧ став чужӧмнас деревнялань, сылы деревня мышсӧ петкӧдлӧ.

— Деревняыд деревня и эм, деревняӧн и кольӧ. Кутшӧм лӧсьыда висьталі-а... Комиӧн!.. Комиӧн!.. Зэв тай!.. Коминас ме ог куж ни. Йӧйӧсь йӧзыд деревняад. Мун дай бергӧд налы чужӧмтӧ!

Ок, Иван Лукич! Чужӧмыдкӧд ӧд вежӧртӧ тшӧтш колӧ деревнялань бергӧдны. Сійӧс тэ и вунӧдӧмыд.