ТУРНЕПС КӦДЗӦМ ЙЫЛЫСЬ

27-ӧд номер «Югыд туй» газетын гижӧма вӧлі: кыдзи колӧ гӧрны, куйӧдавны му турнепс^Турнепс — мӧс сёркни./^ улӧ бура вӧдитчӧмӧн.

Таысь кындзи колӧ тӧдны мыйсюрӧ и турнепс кӧдзӧм йылысь. Кӧйдысыс сылӧн морт сёян сёркни кодь жӧ. Чужан вынсӧ кутӧ 2−3 во. Кӧдзтӧдз колӧ аслыд видлыны либӧ ньӧбигӧн юавны кӧйдыслысь чужан вынсӧ. Бур кӧйдыс ёгтӧм, ӧтпырйӧ дай бура чужӧ (70−85 сё тусь пиысь). Кӧйдыс позьӧ судзӧдны му-видз уджалан кӧлуй вузасянінысь. Ӧти пунт кӧйдыс сувтӧ 20−25 ур гӧгӧр. Пудовня ид му улӧ турнепс кӧйдыс сӧмын колӧ 1½ пунт. Кӧдзны турнепсӧс колӧ водзджык, медводдза кӧдзаяс дырйи. Петасыс кӧдзыд асывъясысь оз пов. Сёрмас кӧ кӧдзаыд турнепслӧн, ёнджыка ӧбӧдитӧ сійӧс гаг («му пытш»).

Бура гӧрӧм, пинёвтӧм да куйӧдалӧм бӧрын мусӧ колӧ визьйӧдлыны веськыда беддьӧн. Мед визь туйыс вӧлі вершӧк джын судта кымын. Сійӧ визь туяс и колӧ лэдзавны ӧтикӧн кӧйдыстӧ — быд вершӧк костӧ. Та бӧрын визьсӧ колӧ кокньыдика тыртны муӧн. Ёна бура турнепс кӧйдысыс чужӧ, тыртан кӧ сійӧс сьӧд муӧн либӧ ёна важся посни куйӧдӧн. Визь костъяссӧ колӧ кольны 2½−3 весьт. Тадзи кӧдзӧны киӧн.

Машинаӧн (шусьӧ «Планет») кӧдзны турнепстӧ позьӧ ёна ӧдйӧ. Машинаыд ачыс визьсӧ вӧчӧ, пуктӧ кӧйдыс кыдзи колӧ. Машинаыс абу вӧлӧн уджалан. Вермас сійӧн кӧдзны челядь. Воддза ногӧн кӧ, доныс сылӧн вӧвлі 20−25 шайт.

Кодъяс оз вермыны ньӧбны машина, ассьыныс уджнысӧ ӧддзӧдӧны ас вӧчӧм «машинаӧн» кӧдзӧмӧн. Колӧ босьтны полуштопнӧй сулея, сэтчӧ пуктыны турнепс кӧйдыс да пробкаавны. Та бӧрын пробкаас вӧчны розь да сюйны сэтчӧ тар борд перӧ, кодлысь йывсӧ чегны колӧ сідзи, мед коляс розьыс ӧти кӧйдыс тӧрмӧн. Таркйӧдлан кӧ копыртӧмӧн сулеясӧ — сійӧн позьӧ кӧдзны зэв ӧдйӧн.

Агроном Темноев.