РЫКОВ ЁРТЛӦН СЁРНИ НЕПАРТИЙНӦЙ КРЕСТЬЯНАЯСКӦД.

Ростов Дон ю бердын. Февраль 2-ӧд лунӧ Рыков ёртлӧн вӧлі сёрни войвыв Кавказса Сӧветъяс съездвывса делегатъяскӧд — непартийнӧй крестьянаяскӧд. Кыв висьталісны комын крестьянин. Найӧ висьталісны: налог пӧ крестьяналы сьӧкыд мынтыны. Колӧ пӧ налог босьтӧмысь мездыны посниулов скӧтӧс, колӧ пӧ вӧвъяс вылӧ налог пуктігӧн тшӧтш видзӧдлыны, уна-ӧ кӧзяйствоын уджалысь киыс. Висьталысьяс ставныс шуисны: колӧ пӧ нуӧдны му-видз лӧсьӧдан удж (землеустройство), сэсся колӧ пӧ нюжӧдны срокъяс налогъяс да ссудаяс мынтӧмлы. Вочакывйын крестьяналы Рыков ёрт шуис: меным пӧ медъёна колӧ вӧлі кывлыны тіянсянь сельскокӧзяйственнӧй налог йылысь. Тіянлысь кывзігӧн меным дум вылӧ воис, мый миянлы лоӧ эновтчыны мӧд во кежлӧ налог лӧсьӧдӧмын важ пӧрадоксьыс. Тані унджыкыс висьталісны, кыдзи налог босьтӧны удж нуӧданінъяс, эз ньӧти висьтавны, код боксянь омӧль, код боксянь бур налог йылысь законыс. Тані висьталысьяс норасьӧны — мельничаяс да вый вӧчан заводъяс пӧ кулакъяс киын. Найӧ пӧ крестьянаӧс топӧдӧны. Тані мыжаӧсь асьныс крестьяна. Сӧветъяс пыр бура да аслыныс уджалӧмӧн крестьяналы позис кулакъясӧс не лэдзны тайӧ уджас.