ВИСЬТАВЛӦЙ СӦВЕТЪЯСЫН УДЖ ЛӦСЬӦДӦМ ЙЫЛЫСЬ

Коммунист партия да Сӧвет власьт ӧнія асланыс уджын ёна ыджыдӧн лыддьӧны сӧветъясын удж ловзьӧдӧм да бурмӧдӧм. Ӧнісянь тайӧ уджӧ партия кутчысис чорыда. Медся ёна дай медводз колӧ бурмӧдны удж медулыса, медматысса йӧзлы сӧветъясын — сиктса сӧветъясын. СССР-са ЦИК Президиум бердын сӧветъясын удж лӧсьӧдӧм йылысь сӧвещанньӧ петкӧдліс став коланлунсӧ сӧветъясын удж ловзьӧдӧм да бурмӧдӧм йылысь, индаліс туй тайӧ уджсӧ нуӧдӧмлы.

Миянлы колӧ кужны пуктыны тайӧ уджсӧ сідзи, медым став йӧзсӧ, кодъяслы сетӧма права бӧрйыны, кыскыны сӧветъясын удж ловзьӧдӧм да бурмӧдӧм дінӧ, тшӧктыны налы аслыныс тайӧ уджас босьтчыны. Тайӧс кӧ ми огӧ кужӧ вӧчны, огӧ кужӧ нуӧдны, сӧветъясын удж бурмӧдӧм кольӧ куш сёрниӧн.

Октябрса революциясянь непартийнӧй рабочӧйяс да крестьяна ёна нин водзӧ важ серти мунісны политика уджын, асьнысӧ югдӧдӧмын. Налы колӧ сетны удж, найӧс колӧ пыртны сӧветъясӧ, тшӧктыны сэні аслыныс уджсӧ нуӧдны.

Кыдзиджык ми вермам став йӧзсӧ, налысь ас сюсьлунсӧ тшӧктыны уджавны сӧветъяс ловзьӧдӧмын да бурмӧдӧмын? Колӧ миян дзикӧдз матыстны сӧветъяснымӧс уджалысь йӧз бердӧ. Медым уджалысь йӧз аддзӧны быд воськов сӧветлысь, медым найӧ кужисны индавны сӧветлы уджсямсӧ. Колӧ дзик став йӧзсӧ бӧрйысигъясӧн кыскыны бӧрйысьӧмъясас. Сэки найӧ кутасны зільны сӧветъясын удж бурмӧдӧм йылысь, сэки сӧветъясысь нелючки удж артмыштӧмысь мыжсӧ босьтасны йӧзыс ас выланыс. Колӧ корсявны сӧветъяслысь неладнӧ удж мунӧмсӧ, кыті-мый колӧ лӧсьӧдны, кутшӧм ногӧн кӧні бурмис сӧветъясын удж.

Тайӧ уджыс регыдӧн оз эшты, лоӧ нуӧдны, гашкӧ, дзонь вояс. Колӧ паськыда-паськыда помала, дугдывтӧг висьтавлыны йӧзлы, сёрнитны накӧд, кывзыны налысь удж веськӧдан тшӧктӧмсӧ сӧветъясын удж лӧсьӧдӧм йылысь, кутны йӧзлысь думнысӧ сӧветъяс удж бердын.

Ӧні неважӧн СССР-са ЦИК Президиумын вӧлі сӧвещанньӧ сӧветъяс удж лӧсьӧдӧм йылысь. Тайӧ сӧвещанньӧыслысь шуӧмъяссӧ, вӧчӧмъяссӧ колӧ висьтавлыны йӧзлы, колӧ шуӧмъяс, вӧчӧмъяс йывсьыс сёрнитны. Тасянь колӧ босьтчыны сӧветъясын удж лӧсьӧдӧмӧ, бурмӧдӧмӧ.