МИЯНЛЫ ГИЖӦНЫ

Лӧкчим пи гижӧ Мордін вӧлӧсьтувса Дань сикт йылысь (Кулӧмдін уездын). Сэні 267 морт олӧ, да на пиысь сӧмын куим морт кужӧ лыддьысьны да омӧлика гижыштны. Дерт, велӧдчытӧм йӧзыд ёна на пемыдӧсь, оз на гӧгӧрвоны лючки Сӧвет власьтлысь да коммунист партиялысь удж нуӧдӧмсӧ. Оз тӧдны, кыдзи коммунист партия вермасьӧ религиякӧд (енлы эскӧмкӧд). Сы кузя вермасны лоны шуасьӧмъяс. Со мый гижӧ:

Даньын кодікӧ паськӧдӧма юӧр: енъяс вылӧ пӧ (ӧбразъяс вылӧ) пуктӧны вот (налог). Сы понда став йӧзыс ӧбразъяссӧ керкасьыныс босьталӧмаӧсь да дзеблалӧмаӧсь гӧбӧчьясаныс да жытникъясаныс. Дзонь тӧлысь «енъястӧг олӧмаӧсь». Ӧні сэсся казялӧмаӧсь прӧста шуӧмъяссӧ паськӧдӧм йылысь да бӧр ӧбразъясыд кыптӧмаӧсь ен джаджъясӧ. Йӧзыс шуӧны: весьшӧрӧ пӧ тай дзонь тӧлысь лои овны ентӧг.

Школа Даньын абу. Йӧзыслы эськӧ зэв колӧ школаыд.

Уонолы колӧ эськӧ восьтыны Даньын школатӧ.

Морт гижӧ читаёвса кооперативлысь омӧля тӧргуйтӧмсӧ сьӧм тырмытӧмла.

Крестьяна унаӧн шленӧ пырны оз вермыны, нажӧткасӧ некысь оз вермыны босьтны да. Обсоюзлы колӧ сетны татшӧм кооперативъяслы тӧваръяс уджӧн дырджык срок кежлӧ.

Кӧтшпомын (Сыктыв уездын) ёна на юӧны самӧкур. Том йӧз юасны да ветлӧдлӧны пуртъясӧн да мукӧд пӧлӧс ӧружйӧӧн, косясьӧны ас костаныс.

Рӧштво лунӧ весиг туй кузя мунны он лысьт вӧлі. Колӧ дугӧдны татшӧм лёк олӧмсьыс Кӧтшпомсаясӧс.