КЫДЗИ ВОСЬТАВНЫ СЕЛЬСКОКӦЗЯЙСТВЕННӦЙ КРУЖОКЪЯС СИКТЪЯСЫН
Мӧскуаса губерняув вӧлӧсьтъясын уналаын лӧсьӧдалӧмаӧсь сельскокӧзяйственнӧй кружокъяс. Медся ёна уджалӧны кружокъясын, кодъясӧс восьтӧмаӧсь комсомол ячейкаяс. Сійӧ сы вӧсна: 1) РЛКСМ-ӧ пырӧм том йӧз велалӧмаӧсь нин ӧтвывджык овны да уджавны, 2) йӧзыс сэні гӧгӧрвоысьджыкӧсь, сьӧлӧмсьысджык босьтчӧны бурмӧдны кӧдза-пуктасъяс, му-видз уджалӧмъяс, 3) удж нуӧдысьыс комсомол пытшкын бурджык.
Колӧ зільны босьтавны кружокъясӧ нывбабаясӧс да нывъясӧс. На сайын уна сельскокӧзяйственнӧй олӧм бурмӧдӧмыд. Пемыдлуныс да велӧдчытӧмыс налӧн мытшӧ овмӧс бурмӧдӧмтӧ да паськӧдӧмтӧ. Колӧ найӧс асьнысӧ кыскыны выль уджас, медым ас синнас аддзӧны бурсӧ выльнога уджалӧмсьыс.
РЛКСМ-ыд кӧ абу вӧлӧсьтад, позьӧ найӧс восьтыны, торъя индалӧм серти (
Сельскокӧзяйственнӧй кружок оз ков лун-мӧд либӧ тӧлысь кежлӧ восьтыны, мед уджалӧ сійӧ помала. Уджыс медым водзвыв лӧсьӧдӧм план серти мунас, дорвыв. Шыбласьны оз позь. Плансӧ колӧ лӧсьӧдны агроном велӧдӧм серти, агрономыскӧд тшӧтш.
Планыс, позьӧ шуны, со кутшӧм колӧ. Собранньӧ вылын колӧ бӧрйыны крестьянскӧй овмӧсысь да удж нуӧдӧмысь медомӧльяссӧ. Босьтан сэтшӧмторъяссӧ 4−5-ӧс кымын дай пондан зільны бурмӧдны сійӧс выльнога уджалӧмӧн, выль пӧлӧс пуктасъяс вӧдитӧмӧн. Унатортӧ ӧтпырйӧ кутчысьны оз ков. Лучшӧ ӧтитор вӧчны да бура.
Планад колӧ урчитны, кодлы мый вӧчны кружокын, кор кежлӧ помавны сетӧм удж. Плантӧ колӧ вӧчны торйӧн: тӧв кежлӧ, тулыс кежлӧ, гожӧм кежлӧ да ар кежлӧ.
Тӧв кежлӧ со кутшӧм уджъяс позьӧ лӧсьӧдны: 1) лыддьысьӧм, 2) сёрнияс овмӧс бурмӧдӧм йылысь, 3) докладъяс. Лыддьысьӧм бӧръясас видлавны: 1) кӧйдыс весалӧм, 2) картаяс шонталӧм да югдӧдалӧм, 3) кӧйдысъяс быдтавны, 4) том скӧтуловӧс быдтыны, 5) скӧтӧс весавны, 6) идзас шыран машинаясӧн, вартан машинаясӧн ёнджыка уджавны, 7) с.-к. библиотекаяс восьтавны.
Кружокса уджъяс йылысь колӧ гижавны газетъясӧ, тӧдмӧдавны йӧзӧс собранньӧяс, скодъяс вылын. Кружок восьтӧм, уджалӧм йылысь гижӧдъяссӧ колӧ видзны. Мӧдысь зэв коланторъяс лоӧны найӧ.
Агроном Темноев.
