КЫДЗИ СУДЗӦДӦНЫ СЬӦМ МУ-ВИДЗ УДЖАЛАН МАШИНАЯС ВЫЛӦ

Наркомзем Центрса Сельскокӧзяйственнӧй Банккӧд лӧсьӧдӧмаӧсь, кыдзи коллективъяслы (ӧтув уджалысьяслы) удждавны сьӧм му-видз уджалан машинаяс ньӧбалӧм вылӧ. Сійӧ лӧсьӧдӧм сертиыс коллективъясӧн сьӧм коран заявленньӧяс вылын колӧ виза (пасйӧд) крестьяна мӧда-мӧдлы отсасян обществояссянь, агрономъяссянь. Пасйӧдсӧ обществояс да агрономъяс пуктӧны сӧмын коллективъяслы, кодъяс асьныс му-видзсӧ уджалӧны, кулакъяслы пуктыны оз позь. Ӧтка крестьяналы машинаяс ньӧбӧм вылӧ сьӧм удждыссьӧ сӧмын волисполкомсянь гижӧд мыччӧм мысти крестьянин овмӧс йылысь да крестьяна мӧда-мӧдлы отсасян обществосянь пасйӧд пуктӧм мысти, мый сьӧм удждысьыс му-видзсӧ ачыс уджалӧ.