ПОШТА КУД

ПИОНЕР ПОПОВЛЫ. КӦРТКЕРӦС. Пионер чукӧрад удж йылысь ӧтпырйӧ дай ӧти йылысь гижӧмыд кык статьяын. Ӧтисӧ лэдзим. Мыйлакӧ ӧтиторсӧ кык пӧрйӧ гижан, кадсӧ весьшӧрӧ воштан? «Ленин ёрт» статьяыд оз мун газетын.

МЕЖАДОР. ТУРКИНЛЫ. Тэнад гижӧдыд воис. Шуӧмыд — велӧдчысьяс пӧ чукӧртісны 50 ур да судзӧдӧны газет. Миянлы воис сӧмын 2 ур. Ысты тырмидз, сэки ыстам газет.

НОШУЛЬ, крестьянинлы. Гиж ним-овтӧ да адрестӧ, сӧмын сэки лэдзам газетӧ. Ассьыд збыль овтӧ он гиж, дерт, тыдалӧ, лӧжӧс гижан.

БЫДӦНЛЫ ГАЗЕТӦ ГИЖЫСЬЯСЛЫ. Комсомол рӧштво колльӧдӧм йылысь ӧткымынлаысь ми гижлім газетын. Ӧні бара сы йылысь зэв уна воис юӧръяс. Ми найӧс эгӧ нин газетын лэдзӧй — ӧти-кӧ, сёрмӧмла, мӧд-кӧ, газетын места тырмытӧмла.

КУЛӦМДІН. ДОНСАЛЫ. «Ленинлы» стихотворенньӧтӧ сетім коми литература лӧсьӧданінӧ.

КӦРТКЕРӦС. ПИОНЕР П. С. ПОПОВЛЫ. Ыстӧм стихотворенньӧясыд газетын оз мун, Ленин йывсьыд сёрмис дай омӧля артмӧма. Сетім коми литература лӧсьӧданінӧ.

КӦРТКЕРӦС. СПИРА ПРОКӦЛЫ. Газет сиктъясӧ сёрӧн воӧм йылысь уна нин ӧні на гижавлім. Пошта ӧні босьтчас бурмӧдны тайӧ уджсӧ. Сы вӧсна «Коді мыжа?» гижӧдыд оз мун газетын.

СЫКТЫВДІНКАР. И. А.-лы. «Няньтор» стихотворенньӧыд оз мун. Гиж асланыд стенӧ ӧшӧдан газетад. Миянлы гиж, кыдзиджык оланныд — прозаӧн.

НЯШАБӦЖ. ПРИЕЗЖИЙ-лы. «Кулакъяс да попъяс абу на пӧтӧмаӧсь» гижӧднад нинӧм он висьтав, газетын оз мун.

ВОЛСЯ. ПЕЛЬПӦЛАЛЫ. Спекулянтыдлысь босьтасьӧмтӧ газетын лэдзӧмысь нинӧм. Мый сылысь босьталісны, гашкӧ, сэтшӧм тӧварыс эз вӧв кооперативаныд?

ПОЗТЫКЕРӦС. Ӧ. Ӧльӧлы. Школаса выставка йывсьыд оз мун.