ЛЕНИН ЁРТЛЫСЬ КУЛАН ЛУН КАЗЬТЫШТӦМ

Ленин кулан лунӧ — Коншаын, Мордінса вӧлӧсьтын, Кулӧмдін уездын — вӧлі собранньӧ крестьяналӧн ӧтув коммунист партияса шленъяскӧд да комсомолечьяскӧд. Совпартшкольник Шадрин ёрт да велӧдысь Тюрнин висьтавлісны йӧзыслы Ленинлысь олӧмсӧ, сылысь уджсӧ коммунист партияын, гӧль йӧзлысь олӧмсӧ кокньӧдӧм вӧсна тӧждысьӧм йылысь. Висьтавлісны Ленин да кооперация, Ленинлӧн тшӧктӧмъяс йӧзӧс велӧдӧм йылысь. Сійӧ сёрнияссӧ кывзӧм бӧрын крестьяна шуисны ёнджыка ӧтувтчыны коммунист партия бердӧ, чорыда мунны Ленин индӧм туйӧд; чорыдджыка кутчысьны кооперация бердӧ. Надейтчам пӧ ми гӧрд учительяс вылӧ, найӧ челядьнымӧс велӧдасны, кыдзи тшӧктыліс Ленин ёрт.

Мӧд лунас (январ 22-ӧд лунӧ) вӧлі собранньӧ коммунист партия шленъяслӧн комсомолечьяскӧд. Рытнас вӧлі митинг. Висьтавлісны 1905 воын январ 22-ӧд лунас уджалысь йӧзӧс сар тшӧктӧм серти лыйлӧм йылысь, 1905 вося революция йылысь.