ЭРРИО ВАЖ УДЖЙӦЗЪЯС ЙЫЛЫСЬ

Париж. Январ 28-ӧд лунӧ Палата заседанньӧ вылас Эррио (Франция парламентын юралысь) висьталіс Франциялысь мукӧд государствокӧд олӧм йылысь. Унджыкыс тайӧ висьталӧмас вӧлі СССР-кӧд волысьӧм йылысь. Эррио шуис: «Ме висьтавлі нин Кашенлы (Францияса парламентын депутат, коммунист), ӧні бара шуа — Франция СССР-ӧс оз зіль босьтны кытш пиӧ (политика окружения). Мед некод тайӧс прӧстасӧ оз шу. Сідзи жӧ ме некодӧс ог лэдз суитчыны Франция пытшкын олӧмӧ». Сэсся Эррио казьтыштіс уджйӧзъяс йылысь да СССР-са велӧдысьяс съезд вылын Рыков ёрт висьталӧм (речь) йылысь; шуис: «Французъяс нёль миллион морт удждылісны сьӧм важ Россиялы. Найӧ удждылісны эз сӧмын сар правительстволы, а тшӧтш Россияса карса управленньӧяслы, банкъяслы, кӧрт туйяслы, пабрик-заводъяслы. Некыдзи оз позь эскыны шуасьӧмъяслы — быттьӧ пӧ миянӧн удждылӧм сьӧм муніс куш Россияса удж нуӧдысьяслы мынтысьӧм вылӧ да армия видзӧм вылӧ. Ми огӧ лэдзӧй шуавны, быттьӧ пӧ ми удждавлім сьӧмъяс важ роч правительствоӧс куш дорйӧм кузя».