СЬӦМ ЧӦЖАН КАССА ЙЫЛЫСЬ

Ӧні миян коми крестьяна быд вӧлӧсьтын нажӧвитчӧны, сьӧм босьтӧны. Унджыкыс сійӧ сьӧмсӧ кутӧны кианыс либӧ кӧнкӧ дзебӧмӧн видзӧны. Сідз видзны оз шогмы: сідз видзӧмысь ӧд некутшӧм пӧльза оз лок, сэсся вермасны гусявны, вермас вошны, вермас сотчыны, с. в. Мед эськӧ сэтшӧм дивӧыс оз ло, сьӧм колӧ пуктыны сьӧм чӧжан кассаясӧ (сберегательная касса). Сэні сьӧмыд медбура олас: некытчӧ сэні сійӧ оз вош дай ваяс ещӧ содтӧд сьӧм пуктысьяслы. Сэтшӧм содтӧдыс воӧ быд шайтӧ 6 урӧн во гӧгӧрӧн.

Сьӧм чӧжан кассаясысь сьӧм вошӧмысь кыв видзӧ миян сӧветскӧй правительство став аслас овмӧснас.

Сійӧ жӧ кассаас позьӧ пуктавны и удждысян государственнӧй билетъяс. Сэні кутасны билетъясысь купонъяссӧ вундавны срок тырӧм бӧрас, купон дон мындаыс сьӧмсӧ содтасны пуктӧм сьӧм дінас. Сэні жӧ асьныс кутасны видлавны, оз-ӧ усь билет вылӧ воӧм (выигрыш). Усьӧ кӧ, воӧмсӧ пырысьтӧм-пыр сетасны билетсӧ кассаӧ пуктӧм мортлы.

Кассаӧ сьӧмтӧ позьӧ пуктавны зэв этшаникӧн, весиг 1 урӧн. Сӧмын колӧ ньӧбны пошта вылысь маркаяс, ляскавны найӧс бумага вылӧ да кор чукӧрмыштас маркаыс, сэк сетны пошта вылӧ. Сэні марка дон сьӧмсӧ гижасны нарошнӧ сетӧм книжка вылӧ. Водзӧ вочасӧн пыр позьӧ сійӧ книжка серти пуктавны сьӧмтӧ кассаӧ. Кор ковмас сьӧмыд, позьӧ пырысьтӧм-пыр бӧр босьтны мыйта колӧ, позьӧ став пуктӧм сьӧмсӧ босьтны.

Сьӧм пуктыны позьӧ мукӧд йӧзсянь гусьӧн. Сӧмын тӧдны кутас пуктысьыс.

Касса пыр жӧ сэтчӧ сьӧм пуктӧмӧн позьӧ мынтыны налогъяс. Сійӧ бара кокньӧд уджалысь йӧзлы. Оз ков сэки виччысьны да аслыд ветлӧдлыны. Сӧмын тшӧкты кассатӧ пуктӧм сьӧмнад мынтыны.

Татшӧм сьӧм чӧжан кассаыс ӧні быд вӧлӧсьтын быд поштӧвӧй отделенньӧын восьтӧма.

Тӧварышъяс крестьяна! Вайӧ жӧ пукталамӧ, коді мыйта вермам, мыйта эм, сьӧмъястӧ кассаӧ. Сэні сьӧм видзӧмысь миянлы аслыным зэв ыджыд бур.

М. Колегов.