ПИСЬМӦ РЕДАКЦИЯЛЫ

Редактор ёрт!

Ми, Межадорса ликпунктын велӧдчысьяс, ыстам ыджыд аттьӧ Сӧвет власьтлы. Куим тулыс сайын миян синъяс гижӧдъяс вылӧ вӧлі на тупкӧсаӧсь. Ӧні кужам нин гижны, лыддьысьны. Лыддям книгаяс, газетъяс. Кӧсйысям водзӧ паськӧдны велӧдчӧмӧн ассьыным юр вежӧрнымӧс.

Миянлы велӧдчыны ёна отсаліс «Югыд туй» газет. Ыстам комиӧн гижысьяслы ыджыд аттьӧ. Ас кывйӧн миянлы вӧлі кокниджык велӧдчыны. Мыйӧн тӧдмалім шыпасъяс да кужны кутім лыддьысьны — быдтор пондім гӧгӧрвоны.

Ыстам тайӧ письмӧкӧд сьӧм да корам «Югыд туй» газет ас кывъя номеръяссӧ.

Гырысь школьникъяс.