«БУРСЬЫЛЫСЬЯС»

Донын (Кулӧмдін уездын) ёна на, ёна пемыдӧсь йӧзыс. Сэні вый пиын моз олӧны йӧзӧс пемдӧдысь йӧзыд. Эмӧсь «бурсьылысьяс». Найӧ чукӧртчасны ӧтлаын ставныс кутшӧмкӧ керкаӧ да ном чукӧр моз зыньгӧны, лӧвтӧны. Сьылӧны да висьтавлӧны, мый кор лолӧма, мыйяс войяснас вӧтасьӧмаӧсь. Сэсся ставныс, коді эм керкаас, ӧтвыв «бурсьылысьяскӧд» шензьӧны висьтавлӧм вылӧ. «Бурсьылӧмъяс» кывзӧм вӧсна ӧткымын морт йӧймӧм выйӧ нин воисны. Ӧти лунӧ Спира Ӧльӧш став семьясӧ лунтыр пидзӧсчаньӧн юрбитӧдӧма. Дема Паладь висьталӧ: меным пӧ кыкысь богородича явитчыліс да пидзӧс вылӧ пуксьыліс. Ларъяк Вась эм да, горулӧ кӧ лэччас да пуксяс, Кужйӧ либӧ Эжолӧдз воас (сідзи висьталӧ сійӧ). Тайӧ ӧд мый на. Ларъяк Вась жӧ шуӧ: ме пӧ верма нин лэбзьыны керӧс вывсянь кильчӧ вылӧдз.

Дыр-ӧ бара, бур йӧз, асланыд пемыдлунӧн кывзанныд ылӧдчӧмсӧ да сӧрӧмсӧ «бурсьылысьясыслысь»? Кад нин наысь эновтчыны. Вежӧра войтыр, кутчысьлӧй ті югдӧдны пемыд йӧзӧс, мырддьӧй найӧс «бурсьылысь» кипод улысь.