КОМИ ШЫПАС ЙЫЛЫСЬ

Бара таво кежлӧ кыпӧдчис вензьӧм коми шыпас йылысь. Газет пыр тшӧктӧны ӧткымын вежны ӧнія шыпас латинскӧй шыпасъясӧн. Мукӧд шуӧны босьтны коми гижӧдын роч шыпасъяс. Вензьӧм-вензьӧмӧн — уджсӧ мыйкӧ колӧ водзӧ жӧ вӧчны. Вит во сайын босьтісны Молодцовлысь шыпасъяс. 1923ʼ воӧ газетын вензисны, кутшӧм шыпас лӧсялӧ коми кывлы. Сэки коли Молодцовлӧн шыпасъяс. Молодцовлӧн шрифт коми кывйӧ медся лӧсялӧ, сійӧс велӧдны кокни, коми мортӧс оз дзугны чорыд да небыд шыясыс. Молодцовлӧн шыпасъяс — шыпас коми йӧзлӧн. Сійӧс ӧні ми ставным велӧдім, школаясын велӧдӧны, уна книга ставыс гӧгӧрвоана лэдзӧма. Сӧмын колӧ ёнджыка нуӧдны комиӧдан удж. Ме тайӧ вензьӧмысь аддза сӧмын дзугӧм, падмӧдӧм, нюжйӧдлӧм комиӧдан удж нуӧдӧмысь. Латинскӧй шрифт коми йӧзыд некод оз тӧд. Тӧдтӧм шыпаснад ог тӧд, ёна-ӧ югдӧдан йӧзӧс. Колӧ тӧдса шыпасъяссӧ водзӧ паськӧдны-йӧзӧдны. Миянлы колӧ регыдджыкӧн велӧдны коми крестьянаӧс, матысмӧдны найӧс Сӧвет власьт бердӧ, кыпӧдны налысь ӧдйӧнджык овмӧс. Тайӧ оз вермы лоны вензьӧмӧн да быд во шрифтъяс вежлалӧмӧн. Лоӧ сӧмын бура, ӧтвылысь комиӧдан удж нуӧдӧмӧн.

Чорыдджыка ӧтвылысь, став велӧдчӧм йӧз, босьтчӧй нуӧдны комиӧдан удж. Паськыдджыка восьтӧй коми шыпаслы туй. Мед коми морт регыдджык вӧтлас ас дінсьыс пемыдлунсӧ.

Эжваса морт.