ПОДА ПОШТАЯС

Уна сиктъяссянь, вӧлӧсьтъяссянь кывсьылӧ норасьӧм шоча выль юӧръяс воӧм вылӧ. Миян обласьтын кӧрт туйяс абуӧсь. Обласьт шӧрсянь вӧлӧсьтъясӧдз зэв ылын (500 верст сайӧ). Поштӧвӧй контораяс восьталӧма этша на, телеграф — сідзи жӧ. Газетъяс, письмӧяс пыравлӧны парма пельӧсъясӧ шоча. Сы вӧсна коми крестьянинлӧн олӧм сэтшӧм жӧ пемыд, кутшӧм пемыд сьӧд вӧр шӧр. Кыдз нӧ сэсся тадзитӧ он норась.

Неважӧн Союзса Народнӧй Комиссаръяслӧн Сӧветыс нуӧдіс сёрни сиктъяс бердӧ поштаӧс матыстӧм йылысь. Шуис: регыдджык быд вӧлӧсьтӧ восьтавны пошта контораяс. Сиктса школаяс дорӧ, кооперативъяс дорӧ да лыддьысян керкаяс дорӧ — лӧсьӧдавны пошта кудъяс, агентъясӧс.

Мукӧд губерняясын татшӧм уджыс мунӧ нин. Сэтчӧс крестьяналы юӧръяс кутасны воны унджыкысь, ӧдйӧджык. Миян паськыд Коми муын пошта контораяс да телеграфъяс восьталӧм кындзи ёна на колӧ думыштлыны быд пемыд пельӧсӧ юӧръяс матыстӧм йылысь. Ми тӧдам, уна сиктъяссянь вӧлӧсьтъясӧдз ылын. Ветлысь овлывлӧ зэв шоча.

Ӧні коми йӧз кыдз-мый вермӧ кыссьӧ югыдлань. Кыдз-мый коді вермӧ — колӧ отсавны. Выль юӧръясысь быдӧнлӧн зэв ёна бырӧ гаж, медся нин том войтырлӧн. Уналаын пошта воӧмтӧ виччысьӧны чӧскыд сёян моз. Пошта воас да, пырысь-пыр жӧ чукӧртчӧны лыддьысян керкаӧ, кывзӧны выль юӧръяс.

Боки сиктъясӧ татшӧм юӧръясыс воасны дыр мысти. Мукӧддырйи сӧмын кыв-кыв вывті. Унаысь сиктъясӧ воӧм газетъяс, письмӧяс вежон чӧжӧн куйлывлӧны волисполкомъясын, унаысь дзикӧдз вошлывлӧны. Тадзитӧ эськӧ зэв жӧ нин абу лӧсьыд да. Ӧнія кадӧ государство некыдз на оз вермы босьтны ас тшӧт вылӧ вӧлӧсьтъяссянь сиктъясӧ газетъяс да письмӧяс новлӧдлӧм. Сы понда крестьяналы колӧ аслыныс та йылысь сёрнитыштны.

Мукӧд губерняясын татшӧм сёрниясыд вӧлӧмаӧсь нин. Водзмӧстчысь войтыр асьныс, некод тшӧктытӧг, переменаӧн, мӧда-мӧдӧс вежлалӧмӧн новлӧдлӧны сиктъясын олысьяс ним вылӧ воӧм газетъяс, письмӧяс. Газет судзӧдысь крестьянаяслы асьныс пыртӧны газетсӧ да отсалӧны налы гӧгӧрвоны.

Миян обласьтын колӧ тадзи жӧ вӧчны. Медвойдӧр быд вӧлӧсьтын колӧ босьтчывлыны коммунистъяслы, комсомолечьяслы, профсоюзса шленъяслы, пионеръяслы, газетӧ гижысьяслы мӧда-мӧдӧс вежӧмӧн разӧдны сиктъясӧ письмӧяс, газетъяс пошта вӧлӧсьтӧ воӧм лунӧ жӧ. Водзмӧстчысь мортыс кӧ сюрӧ вӧлӧсьтын, шуам, 60; сиктъясӧ нуан туй вож — куим, — тӧлысь чӧж кыкысь пошта волігӧн ковмас быд толысьӧ сӧмын квайт морт. Тадзӧн ӧчередьыд пондас волывлыны быд 10 тӧлысь мысти.

Тадзӧн буртор позьӧ сетны сиктса крестьяналы. Кад воас — найӧ казяласны налы бур вӧчӧмсӧ да сэки асьныс босьтчасны уджавны асшӧрӧн, газет судзӧдӧмӧн. Ньӧжйӧникӧн восьталасны быд сиктӧ лыддьысян керкаяс, библиотекаяс. Сӧмын тадзӧн позяс регыдджык матыстны крестьянаӧс югыдлань.

Босьтчылӧй, водзмӧстчысь йӧз, тайӧ удж бердӧ.