КОЛӦ ВИСЬТАВЛЫНЫ ДЗЕБӦМ СКӦТ

Быд тулыс волисполкомъяс гижалӧны крестьяналысь скӧтнысӧ. Сы серти сэсся и босьтӧны налог. Гижавсьӧ (налог улӧ сюрӧны) мӧсъяс арӧн-джынйӧнсянь, вӧвъяс куим арӧссянь. Скӧтлӧн арлыдыс лыддьыссьӧ, кор гижалӧны найӧс, сійӧ вовывса апрель 1-ӧд лунсянь. Овмӧс серти и колӧ лоны налог крестьянинлӧн. Кодлӧн унджык скӧт, сылӧн и унджык колӧ лоны налог (быттьӧ му-видзныс кӧ быд крестьяналӧн ӧтмында).

Сӧмын оз став крестьянаыс на гижӧдавны став скӧтсӧ ассьыныс. Унаӧн на дзебӧны найӧс гижӧмысь, ёнджыкасӧ уна скӧта йӧз. Дзебӧм скӧтыс тӧдчавлӧ сӧмын нин налог босьтігӧн. Сэки йӧзыд мӧда-мӧдлысь тӧдӧны, уна-ӧ кодлӧн налог корсьӧ. Сэсся шуасьӧны: мыйла пӧ нӧ сылӧн этша налогыс ме серти, овмӧсыс пӧ бурджык да. Сэки вӧлисти гӧгӧрвоӧны — абу мукӧдыс став скӧтсӧ гижӧдавлӧмаӧсь. Сэки гӧльджык крестьяна шуасьлӧны: налог пӧ абу ӧткодь, озыр, уна скӧта пӧ этша мынтӧ миян серти. Мукӧддырйиыс тӧдтӧмысла та йылысь власьт вылӧ шуасьлӧны. Скӧт дзебӧмысь Сӧвет власьт, дерт, тӧдлӧм мысти сетӧ судӧ.

Ӧні Обласьтувса финансӧвӧй юкӧд мӧдӧдіс гижӧд финансӧвӧй инспекторъяслы, тшӧктіс налы быд грездын ӧти вежон чӧж бурӧн гижӧдавны крестьяналысь дзебӧм скӧтнысӧ. Коді дзеблӧма колян во скӧтсӧ да сійӧ вежонӧ кӧ висьталас, сійӧ мынӧ судӧ сюрӧмысь. Сӧмын дзебӧм скӧт вылӧ налогсӧ содтасны мыйта воӧ скӧтыс вылӧ, сэсся и нинӧм. Вежон кольӧм бӧрын кутасны видласьны, ставыс-ӧ скӧтыс сюри гижӧм улӧ. Сэки кӧ сюрӧ дзебӧм скӧт, дзебысьсӧ сетӧны судӧ. Мыждыны кутасны суд вылын Уголовнӧй Кодекса 80-ӧд статья 3-ӧд юкӧд серти (80 ст. 3 ст.).

Крестьяна, оз ков воштысьны судӧ сюрӧмӧдз, дзебӧм скӧт колӧ гижалан вежонӧ висьтавлыны.

Дзимбыр.